Roniştoxê Mexmûrî serranê 90an de herêmanê Botan, Serhed, Colemêrg û ê bînan ê Vakurê Kurdîstanî ra zulmê dewleta tirke ra semed koç kenê. Nê kesî verî Şeraniş, Bêrsivê, Geliyê Qiyametê, Etrûş, Nînova, Nehdaran de ca benê la netîceya hêrişanê dewleta tirke de reyna koç kenê. 1994 de Zaxo de grevê vêşanîye ra dima roniştoxê Mexmûrî gêrîyenê binê statuyê multecîtîya sîyasîye. 1998 de zî binê sîwana Neteweyanê Yewbîyayeyan de koçê Mexmûrî kenê.

Dewleta tirke 2017 ra nata bi helîkopteran hêrişê Kampa Mexmûrî kena. Tewr peyên 21ê gulane de hêrişê droneyanê çekdaran ê dewleta tirke de ciwanê bi nameyê Hacî Mîrza Elîyî dinyaya xo bedilnaye. Roniştoxanê Kampa Şehîd Rûstem Cûdîyî ya Mexmûrî rixmê hêrişan zî xoverdayîşê xo dewam keno.

 Hemserekê Meclîsê Şarî yê Mexmûrî Yusif Karayî derheqê hêrişan, tewirê kampe û armancê hêrişan de ANFyî rê qisey kerd.

Yusif Karayî dîyar kerd ke dewleta tirke dewê înan vêşnayî, merdimî qetil kerdî û vat: ''Seba ke şar paştî dano têgêrayîşê azadîye raştê nê hêrişan yeno. Şar neçare mend ke koçê Başûrî bikero. No şar şarê Kurdîstanî yo. 28 serrî yo hêrişê dewleta tirke yê vera şarê Mexmûrî dewam kenê la şar zî xoverdayîş û têkoşînê xo rê dewam keno. Dewleta tirke kena ke kampa ma vila bikera û têkilîya ma ya bi têgêrayîşî bibirna.

No şar teslîmîyetî qebul nêkeno. Armancê hêrişanê dewleta tirke no yo ke şarî esîr bigêra û îradeyê înan bişikna. Dewleta tirke felsefeya Rayber Apoyî ra nêeşkena Rojhelatê Mîyanênî de bi rehetî têbigêra. Dewleta tirke zî sey Osmanîyan şarî rê qirkerdişan ferz kena û wazena pêro şaran bigêra binê kontrolê xo.''

Karayî da zanayene ke dewleta tirke key firsend bivîna hêrişê fikr û îdeolojîya Rayberê Şarê Kurdî Abdullah Ocalanî kena û vat: ''Ma do bi felsefeya Rayber Apoyî xeta Konfederalîzmê Demokratîkî ser o têkoşînê xo rê dewam bikerê. Ma do vera dişmenî çok nêşorê erdî ro. Ma do verê hêrişan de milê xo çewt mekerê û bi azadîya Rayber Apoyî serkewtişê xo tacîdar bikerê.''