Radyoyê RFIyî yê Fransa xeberêke weşanaye û bale ante zêdîyayîşê çolbîyayîşî û vînîbîyayîşê çimeyanê awe ser.

Bi taybetî Çemê Dîcle yo ke çimeyê bi mîlyonan merdiman o, bi hawayêkê cidîyî ameyo gemarinkerdene

Başûrê Kurdîstanî de 850 hezar kesî hema hema eşteyanê herêma Silêmanî yê Tanjaroyî yê Dîcle şimenê.

Aktîvîstêka xoza RFIyî rê qisey kerd û da zanayene ke gemarîya awa Silêmanî cidî ya û vat: ''Heta Derbendîxanî 24 hewzê sey ci est ê. Çop û eşteyê nêweşxaneyan zî est ê û fîlterkerdiş zî çin o. Kesê ke na awe şimenê eke bi şansî nêmirê pê îshalî kewenê. Mîyanê na awe de eşteyê şampuanî, berhemanê kîmyewîyan her çi est ê. Par herême de nêweşîya Kolera zaf bîye. Na herême qaşo warê zîretî ya.''

Her çiqas selahîyetdaran nêrazîbîyayîşanê şarî dima vat ke ê do tedbîran bigêrê hema zî seba pakîkerdişê awe projeyêk nêkerd.