19ê hezîrana 2020î de teyarayanê Tirkîya dewa Sîda ya bajarekê Şeladizê dabi bombayan ver û bombarduman de ciwanî Emîn Salîh, Azad Mehdî, Abbas Adem û Deman Omer qetil kerdbi. Heman roje dewa Golka ya Metîna de zî ciwanêk amebi qetilkerdene. Dewleta tirke xebera bombardumanî sey '3 gerîlayê PKKyî ameyî pirodayene' daye.

2019 de dewleta tirke Zap û Deralok de 5 ciwanî qetil kerdbi. PDKyî  cenazayanê ciwanan de vera PKKyî qisey kerd. Roja bîne rayraşîyayîşêk ame plankerdene, bi hezaran kesî seba rayraşîyayîşî ameyî Gelîya Blanda. La şarî verê xo da baregehê tirkan û dewleta tirke protesto kerde. Baregehêk ame destvistene. Şarî îşxalkeran rê vat ke Şeladizê Kurdîstan de yo û cayê dewleta tirke tede çin o. Leşkeranê tirkan vera şarî guleyî varnayî. Tay kesî şehîd û birîndar bîyî. Emîn Salîh, Azad Mehdî, Abbas Adem û Deman Omerî rayberîya çalakîya vera baregehan kerdbi.

Qirkerdişê nê ciwanan ra dima seba înan merasîmê cenazayan o pîl ame kerdene. Merasîm de ame parekerdene ke cayê ciwanan hetê PDKyî ra dîya dewleta tirke. Şarê Şeladizê reyna vera PDK û dewleta tirke sere wedarna û merasîmê cenazayan de nê mesajî dayî PDKyî:

1-Şeladizê û Amedîyê de baregehê dewleta tirke do bêrê qefilnayene, leşkerê tirkî tede do nêmanê.

2-Kesê ke serewedaritişê Şeladizê de tepişîyayê do bêrê veradayene.

3-Rayîrê dewanê Rêkanî do bêrê akerdene û bombardumanê vera ci do biqedê.

Nê waştişî nêameyî caardene û teda ameye zêdînayene. Dewleta tirke Başûr de baregehê xo zêdînayî, bombardumanê vera Rêkanî zêdînayî, dest na çimeyanê zengînîya binê erdî. PDKyî serewedaritişê şarî sey 'sebebê bêkarîye' mojnaye. Mesuldarê herême yê PDKyî Omer Oreyîyî waşt ke şarê Şeladizê bikero qoricî la şarî qebul nêkerd.

Şarê Şeladizê nika serê goran de ciwanan yad kenê. Rixmê astengkerdişê PDKyî ciwanî cayê serebûtî de yenê yadkerdene. Şar bi nê hawayî mojneno ê rêçê ciwanan teqîb kenê û waştişanê xo ra fek vera nêdanê.