Bado ke çeteyanê DAÎŞî 3ê tebaxa 2014î de Şingal de vera komelê êzidîyan qirkerdiş kerd bi des hezaran êzidîyî mecbûr mendê de ke erdê xo ra bar bikerê. Êzidîyan ke nêwaşt herra Başûrê Kurdîstanî caverdî qismê înano mumîh kampanê Çem Mişko, Keber 1, Keber 2, Bacid Kendale, Şariye, Xankê, Qadiya û Ebabî de ameyî cakerdene. Rixmo ke qirkerdişî 8 serrî xo dima verdayî û Şingal ame azadkerdene êzidîyî kampanê Başûrê Kurdîstanî de têkoşînê zehmetî yê cuya danê.

Temsîlkarê Partîya Demokrasî û Azadîye yê Êzidîyan (PADÊ) Mervan Şengalîyî derheqê  cuya êzidîyan ê kampan û Şingalî de ANFyî rê qisey kerd. Şengalî bade ante şetanê xiraban ê cuya kampan ser û vat: ''Kampan de şar het hetî ra zehmetîye anceno. Mesele zafê înan xeymê ke 2014 de girewtî înan de ciwîyenê. Reyna xeylêk xemî heta nika vêşayî. Xeyman de problemê xurt ê asayîşî est o. Bi qala kilme cuya xeyman cuye nîya.''

Şengalî hema nêagêrayîşê êzdiyan wina ercna: Sebeban ra yew oyo ke buçteyo ke semedê Şingalî dîyayo hema semedê ci nêameyo xerckerdene. Îdareyê Xoserî yê Şingalî bi îmkananê xo çîyo ke destê ci ra yeno semedê caardişê hewceyanê şarî keno. Îmkanê ma qîm nêkenê. Eke hukmatê Iraqî paştî medo şingalijî anêgêrenê û problemê xizmetî nînê çareserkerdene. Sere de ceyran û awe problemê pîlî est ê. Îdereyo Xoser nêeşkeno nînan çareser bikero. Hukmatê Bexdadî semedê agêrayîşê iraqijan paştî dano la semedê şingalijan paştî nêdano. Ma wazenê ke hukmatê Iraqî şingalijan rê hetkarî bikero semedê zirarê madîyî tazmînat bido ci.''

Şengalîyî ard ziwan ke şingalijî semedê agêrayîşî qet problemê nêvejenê û  vat: ''Her qeymeqamo ke yeno Şingal miheqeq pabesteyê hêzêkê sîyasîyî yo û nê semedî ra têna paştî dano yew qismî. Şingal de problemê asayîşî çîn ê. Vengê guleyî zî nîno. Êyê ke îdîayanê asayîşî erzenê werte ma înan rê wina persenê? Başûrê Kurdîstanî de asayîş est o? Çeteyê DAÎŞî her roje hêrişê yew herêma Iraqî kenê. Xora herra Başûrê Kurdîstanî hem hewayî ra hem erdî ra ameya îşxalkerdene. Şima senî eşkenê qala asayîşî bikerê? Şingal zî yew leteyê na herême yo û tîya Rojhilatê Mîyanên o. Na herre de tim hêrişî û mergî est ê. Şingal nika hermanê bînan ê Başûrê Kurdîstanî ra zafêr biasayîş o. Çunke hêzê Şingalî înan pawenê. Eke hêzê bînî tîya bê wextê hêrişan de remenê. Şingalijî rixmê heme hêrişanê dewleta tirke xo ver danê.''

Şengalîyî ard ziwan ke eke şar anêgêro erdê xo, waştişê heqanê xo nêkero mumkîn nîyo ke hêzê bînî bêrê, seba înan çîyêk bikerê. Şengalîyî vat: ''Ne Neteweyê Yewbîyayeyî ne zî Iraq çîyê winasênî kenê. Eke êzidîyî anêgêrê erdê înan destê înan ra do şêro. Nika cîranê êzidîyan; ereb, şîa û tirkmenî agêrenê. Eke şarê êzidîyan abigêro vengê xo berz bikero, do hesabê fermanî zî biperso. Verî ciwanan şawenê teberî ke Şingal veng bibo. Kesê ke destê DAÎŞî ra yenê xelisnayene Şingal de nê teber de yenê dermankerdene. No zî polîtîkayêka vengkerdişê Şingalî ya. Wazenê ke herême de se bîyo wa bêro vîrakerdene. Seba agêrayîşê şarê ma zî Îdareyê Xoserî ra bigêrê heta dezgehanê asayîşî û komelkî pêro dezgehî mîyanê xebate de yê. Warê Asayîşî de hêzê YBŞ-YJŞyî û zere de Asayîşê Êzidxanî Şingalî pawene. Ma her wext tedaya hukmatê Iraqî kenê ke wa rayîrê agêrayîşê Şingalî hol bikero.''