Meclîsê Otonomî yê Demokratîkî yê Şengalî vera galanê dewleta tirke yê vera Şengalî û Başûrê Kurdîstanî yew kampanyaya îmzayî daye destpêkerdene. Çarçewa kampanya de merkezê Şengalî û dewan de seranserê 15 rojan do îmza bêrê arêdayene. Meclîsî sey hedefî nayo xo ver ke 50 hezar îmzayan bido arê.

Îmzayî do biderîyê Netewanê Yewbîyayeyan, Konseyê Emnîyetî yê NY û Hukmatê Iraqî. Hemserekê Meclîsê Şarî yê qeza Sinune Xwedêda Eliyasî derheqê kampanya de RojNewsî rê qisey kerd û venga şarê êzîdîyan da ke bi hawayêkê pêtî tewrê kampanyaya îmzayî bibê. Eliyasî vat “Dewleta tirke sazbîyayîşê xo ra bîyo galê bi kurdan kena û coka kampanyaya îmzayî seba pêro şarê ma ya.”

Dewleta tirke ya îşxalkere hefteyanê peyênan de vera Şengalî galê xo kerdî zêde. Galanê SÎHAyan ê artêşa tirke de ke roja 19 teşrîna peyêne vera Xanesorî kerdo, 5 şerwanê Yewîyê Pawitişê Şengalî (YBŞ) bîbî birîndar. Nê şerwanan ra yew dima canê xo ra bî. Teyareyê şerî ye tirkan şewa 5ê teşrîna peyêne de herêma Barê ya Şengalî hîrê rey bombavaran kerdîbî.4ê teşrîna peyêne de zî Xanasor bombavaran kerdîbî û nê galî de 3 şerwanê YBŞyî bîbî bîrîndar.