Îdarekaranê Meclîsanê Xanesor û Sinûnî yê Şingalî Cengê Heftanînî yê gerîlayan rê selam kerd û pare kerd ke ê paştî danê gerîlayan.

Hemserekê Meclîsê Sinûnî Xwedêda Elyasî vat: ''Xoverdayîşê gerîlayan morê xo dano azadî û ameyoxê kurdan. Merdimê ke seba erdê xo yê fîrazî xo ver danê do ser bikewê. Erdogan sey pîrikanê xo wazeno Kurdîstan îşxal bikero. 2 mengan ra nata Heftanîn de şer dewam keno. Labelê tirkî hema vera gerîlayan ser nêkewtî. Şingalijî deyndarê gerîlayan ê. Ma Cengê Heftanînî rê selam kenê.''

Endamê Meclîsê Sinûnî Mîrza Mehmûdî vat: ''Heftanîn seba şingalijan hêzê têkoşînî yo. Ma Şingalî ra heta Heftanînî gerîlayan rê selam kenê. Şarê ma Vakur û Başûrî yew ê. Seba ma xoverdayîşê gerîlayan bextewarî û serberzî ya. Destê gerîlayan weş bê.''

Hemsereka Meclîsê Xanesorî Fehîme Xelîl vat: ''Gerîlayê YJA-Starî garantîyê azadîye yê. MA do bi destê gerîlayan cuyêka azade biafernê. Ma sey dadîyanê Şingalî xoverdayoxanê Cengê Heftanînî rê selam kenê û lew nanê çimanê înan ro.''

Hemserekê Meclîsê Xanesorî Dexil Muradî vat: ''Hêzê îşxalkerî xîret kenê ke kurdan parçe bikerê û seba menfaatanê xo kurdan bixebitnê. Gerîlayî temsîlê hêzê şaran kenê. Dewleta tirke hemkaranê xo reyde xîret kena ke şexsê gerîlayan de hêz û kulturê komelan çin bikera. Ma heta peynî paştî danê xoverdayîşê gerîlayan û ma Cengê Heftanînî rê selam kenê.''