Endamê Komîteya Merkezî ya PKKyî Cemal Şerîkî dîyar kerd ke Rayberê Şarê Kurdî Abdullah Ocalan dima bi bi Komployê Mîyanneteweyîyî esîr kewto tim mîyanê xoverdayîşê bêmabênî de bîyo û 25 serran de şorişê Kurdîstanî resnayo na aste.
Endamê Komîteya Merkezî ya PKKyî Cemal Şerîkî bi wesîleya serrgêra Komployê 9ê Teşrîna Verêne ya 1998î ANFyî rê qisey kerd.
Qiseykerdişê Şerîkî ra tay noqtayê girîngî wina yê:
''Serrgêra 25. ya Komployê Mîyanneteweyîyî de her çî ra ver ez Rayber Apoyî selam kena ke mîyanê tecrîdî de 25 serrî yo xo ver dano. Şexsê şehîdanê 'Şima nêeşkenê tîja ma tarî bikerê' de ez pêro şehîdanê têkoşînî bi rêzî yad kena.
Rayber Apo zafê nê 25 serran de hucreyê yewkesî de tepişîya la nê prosesî de şoriş qewimîya. Rayber Apoyî mîyanê 25 serran de bêmabên xo ver da û kerd ke şorişê Kurdîstanî bireso na aste. Ey şertê Îmraliyî xo rê sey astengîye nêdîye. Rayber Apoyî zîndan de paradîgmaya demokratîke, ekolojîke û azadîgîrîya cinîyan afernaye û dîyarîya şaran kerde. Rayber Apo serê pêro şaranê dinya de wayîrê tesîrî yo coka hêzanê komplogeran o kerdo hedefê xo.
Ewro şarê kurdî, şarê Rojhelatê Mîyanênî û dinya vera sîstemê îşkence û tecrîdî yê Îmraliyî têkoşîn kenê. Yanî fikrê Rayber Apoyî sînoranê Îmraliyî ra derbaz bîyê û resayê pêro dinya. Teyna şarê Kurdîstanî, kadroyê PKKyî ney pêro dinya wayîra fikranê Rayber Apoyî vejîyena. Ganî merdim bi nînan 25 serranê komployî biercno.
Nê 25 serran de xeylêk rêxistinê ke dima ke lîderê înan tepişîyayê tasfîye bîyî. La Kurdîstan de wina nêbi. Rayber Apoyî bi têkoşînê xo nêverda ke bêro vîrakerdene. Coka şarê kurdî destkewteyê pîlî vistî destî. Nê destkewteyan zî Kurdîstan aver berd. Ganî têkoşînê vera Komployê Mîyanneteweyîyî de zî xoverdayîşê Îmraliyî bêro esaskerdene. Ma eşkenê bi caardişê fikranê Rayber Apoyî ey fam bikerê û komployî û sîstemê Îmraliyî çin bikerê.''
