Fermandarê Yewinanê Pawitişê Rojhelatê Kurdîstanî (YRK) Şîyar Şevgerî qewimîyayîşê peyênî ANFyî rê ercnayî.

Qiseykerdişê Şevgerî ra beşêk wina yo:

''Weçînayîşanê Iraqî de çew ser nêkewt çunke têna se ra 41ê şarî raye daye. Weçînayîşî a raşte goreyê zerrîya Tirkîya, Îran û Amerîka nêbîyî. Sadrî hukmatê xo na ro la eke debikewo binê kontrolê yewna hêzî Iraq de reyan têmîyanîye do biqewimîya. Şarê Başûrî û Iraqî pê hukmat û sîyasetmedaran bawer nêkenê. Rojhelatê Mîyanênî de Têgêrayîşê Azadîye û felsefeya Rayberîye ra ber qet yew hêz nêeşkeno rayberîye bikero. Eke weçînayîşêko azad bibîyêne Têgêrayîşê Azadîye do weçînayîşan de ser bikewtêne. Têgêrayîşo Apogîr hêvîya şaranê Rojhelatê Mîyanênî ya. PDK ney hol zaneno û o nêeşkeno xo Têgêrayîşê Azadîye de hemberî bikero.

Talîban zî bi hawayêkê giranî vera Îranî gef o. Hukmato newe yê Îranî do tedaya vera şarî bizêdîno. Cara netîceya şerê Azerbaycan-Armenîstanî de qismêkê Îranî kewt destê Tirkîya. Tirkîya wazenê Xoyî ra heta Tebrîzî Îran bigêra binê ablûqa û kurdan bi temamî çin bikera. Tirkîya û welatê cîranî wazenê Îranî teslîm bigêrê. Weçînayîşê Iraqî, şerê Armenîstan-Azerbaycanî semedê îranî darbeyêk a. Îran hetê sîyasî û dîplomatîkî ra bin kewt.

Kurdî serkêşîya Têgêrayîşê Azadîye de vera komployan xo ver danê. Şarê herême tim waşt ke azad biciwîyo la key semedê ney gamêke eşt raştê sûîkast û komployan ame ke Qazî Mihemed, Simko Şikakî, Kak Fûat (Mûstafa Sûltanî), Qasimlo, Şerefkendî bi nê hawayî ameyî kiştene. Rojhelatê Kurdîstanî de kurdî dormeyê Rayber Apoyî de ameyî pêser. Vera Rayber Apoyî zî komplo ame kerdene la pê nê komployî têkoşînê kurdan bi pîlêr nêqedîya.

Ûrmîye de şarê azerî û kurdî pîya ciwîyenê. Şarê Ûrmîye semedê azadîye şehîdê sey Selmas, Hêmîn, Dara û Şîrîne dayî. Embaze Zeynepe Celalîyan hema zî zîndan de xo ver dana. Nika Ûrmîye de tay kesî nameyê PDKyî ser o xo rêxistin kenê û propaganda kenê. La şarê ma bizano ke MÎT mîyanê nê karî de yo. Wa şarê ma rayîr medo nê kesan. Nê kesî pê destê MÎTî Wanî ra yenê û pê destê Barzanîyî zî xo rêxistin kenê.

Dewleta tirke şarê Vakurî rê se kena şarê Rojhelatê Kurdîstanî rê zî aye kena. Wa şarê ma vera kayanê dişmenî hişmend bo û kesanê ke wazeno xo Rojhelatê Kurdîstanî de rêxistin bikerê bifetilno. Ma zanenê ke PDK paştî dano Tirkîya. PDKyî semedê şarê kurdî çîyêk nêkerd û do nêkero. Wa ciwanê Urmîye, Selmas, Kotol û Xoyî  bêexlaqan qebul mekerê û wezîfeyê xo bîyarê ca. Wa ciwanê ma xo rêxistin bikerê, tewrê gerîlayan bibê. Gerîlayê Kurdîstanî nika rayberîya PJAKî de têkoşînêkê tarîxî kenê. Ganî ma pîya verê dişmenî de vinderê.

Ganî her kes semedê azadîya Rayber Apoyî kede bido û xîret bikero. Na babete de mesuldarîya tewr pîle kewena milê dadîyanê ma. Wext wextê caardişê azadîya Rayber Apoyî yo, wex wextê awankerdişê Kurdîstanê azadî û komelê azadî yo.''