Artêşa tirke hêrişê waranê gerîlayan kena ke tîya hêzanê xo ca bikero. Warê Şikefta Birîndara de gerîlayan da piro; 8 îşxalkerî ameyî kiştene. Xeta Çîyayê Reşî de gerîlayan bi çalakîya sabotajî verê îşxalkeran girewt. Kurojaro de zî pêkewtişî dewam kenê.
14ê nîsane ra nata Hêremanê Pawitişî yê Medya de warê Zap, Metîna û Avaşînî hetê artêşa tirke ra pê teyarayanê şerî û obusan dîyenî bombayan ver. Artêşa tirke vera waranê Şikefta Birîndara, Kurojaro û Çiyayê Reşî hêrişê îşxalî da destpêkerdene.
Warê Şikefta Birîndara de gerîlayan da verê helîkopteranê dewleta tirke yê ke waştêne tîya leşkeran ronê, girewt. Gerîlayan îşxalkerî girewtê binê kontrolî û hewayêkê bitesîrî da piro; 8 îşxalkerî ameyî kiştene. HPGyî da zanayene îşxalkerê ke arazî de yê binê kontrolê gerîlayan de yê.
Artêşa tirke xeta Çîyayê Reşî ya Başûrê Kurdîstanî de hêrişê hewayî yo giran kerd. Artêşa îşxalkera ke kerd ke pê helîkopteran hêzanê xo tîya ca bikero û eynî wextî de waşt erdî ra aver şiro. Gerrîlayanê HPG û YJA Starî bi taktîkê sabotajî da îşxalkeran ro û verê înan girewt. Mabênê gerîlayan û artêşa tirke de pêkewtişê giranî qewimîyenê.
Hetê bînî ra Kurojaro yê herêma Zapî de artêşa tirke pê helîkopteran waşt leşkeranê xo tîya ca bikero. Herêma ke binê kontrolê gerîlayan de ya tay leşkerî ameyî cakerdene û dima ra pêkewtişî dewam kenê.
