Komeleya Cigêrayîşê Kultur û Ziwanî ya Mezopotamya (MED DER) ya ke seba ke kurdkî cuya komelkî de bêro şuxulnayene xebetan kena, pê kursanê kurdkî wazena ke waranê şuxulnayîşê ziwanî hîra bikero.

Şîlane Kan vist vîrî ke nêzdîya seserran o ke ziwanê kurdkî sey çînbîyaye yeno hesibnayene û vat: ''Seba ke ziwanê ci qedexe yo şarê kurdî zî qedexe yo. Seba ke şar bi zorî erdê ci ra vejîya, no zî verê ziwanî de bi asteng.  Şarê kurdî xozaya ci ra ame dûrîfînayene û ziwanê ci bêpawitiş ame verdayene. Verî ziwanî xo pawitene. La nika seba ke şar zaf bajaran de ciwîyeno kurdkî zaf nîna şuxulnayene. Kurkdî qiseykerdiş sey eybî ame ramojnayene. Kurdkî ziwanêko zengîn o. Seba ke ziwano xerîb tirkî ziwanê perwerde û îqtîdarî yo, kurdkî ver bi çînbîyayîşî şîye.

Komel, roşnvîr û ziwannasî wayîrê kurdkî vejîyayî û çînbîyayîşî ra xelisnaye. Ziwanê kurdî nika sey verî raştê înkarê komelkî nîno la reyna zî ganî zafêr bêro wayîrvejîyayene.  Eke çew bi zanayîşê netewe têbigêro ziwan zî xo pawen û aver şino. Eke wina nebo şansê ciwîyayîşê ziwanê nêmaneno. Mesela ma bi serran o gureyene ke wa ziwanê kurdkî  bêro ciwîyayene û aver şiro. Ma tesîrê nayî zî vînenê. Reyna sîyasetê kurdan ser o zî tesîro rind kerd. Sîyseto ke têkoşînê azadîyan û heqanê kurdan dano ganî ziwanê ci kurdkî bo. Xora bi tewrbîyayîşê partîyanê sîvîlan ê kurdan,komelê sîvîlî û dezgehanê bînan ma platformêk na ro.

Çîyo tewr muhîm ganî ziwanê kurdkî heme dezgehan de û mîyanê komelî de sey fermî, cuya rojaneye de bêro şuxulnayene. Domanê kurdan zaf ziwanê xo nêzanê la wendekarî wayîrê ziwanê xo vejîyenê. Doneyî zaf xirab nêyî la eşkenê holêr bê. Bitaybetî ganî keyeyî domananê xo dir kurdkî qisey bikerî. Ma wayîrê ziwanê xo vejîyê, binusê, biwanê û qisey bikerê.''