Şingal de bi wesîleya serrgêra 8. ya Fermanê 3ê Tebaxa 2014î  aktîvîteya yadkerdişî ameye kerdene.

Şingal de semedê yadkerdişê şehîdan saete 10. 00 de cuya dîya vindarnayene. Badê rêzgirwtişî ciwanan awe vila kerd. Bi seyan cinî, doman û extîyarî têşanîye ra şehîd bibî. Hewtî ra heta hewtayî êzidîyî wiriştê payan ser û waşt wa berpirsîyaranê fermanî ra hesab bêro persayene.

Brahîm Xwedêda Qasoyî vist vîrî ke bado ke pêşmergeyanê PDKyî Şingal caverda ê raştê fermanî ameyî û vat: ''A roje bi hezaran merdimê ma kewtê destê DAÎŞî, bi hezaran cinî, doman û extîyarî têşanîye ra merdî. Sebebê nînan hukmatê Başûrê Kurdîstanî yo. Ê raştîye de îslamî ra dûrî bî, waşt êzidîyan bizorî bikerê misliman. No rîyê Mesût Barzanîyî ra ame serê ma. Rixmo ke fermanî 8 serrî xo dima verdayî ne Iraq ne zî warê mîyanneteweyî de sûcdarê fermanî ra kesêk nêame hukmkerdene. Ganî derheqê sûcdaran de dewa bêro akerdene û ê bêrê muhakemekerdene. Ganî semedê muhakemerdişî qanûnêk bêro vetene.''

Brahîm Xwedêda Qaso vera înan ê ke sey Majid Şengaliyî vanê 'Şingal ê êzidîyan nîyo' nêrazîbîyayîş mojna û vat: '2Êyê ke wina vanê, pere werdo. Şingal de ma heme şaranê bînan rê hurmet kenê la Şingal ê êzidîyan o. 10 ferman zî bêrê ma êzidî yê. Êyê ke bawerî, tarîx û gonîya şehîdanê xo vera pereyî roşenê merdim nîyê.''

Endamê Koordînasyonê TAJÊ Neame Bedel zî bale ante îxanetê PDKyî ser û vat: ''8 serrî verî nê wextan de Şingal kewt destê DAÎŞî û qirkerdiş ame kerdene. Semedê ma rojêka zaf zore bî. Ma do çirey îxanetê keyeyê Barzanîyî xo vîr ra mekerê. Gerîlayan sînorî nas nêkerdî û vazdayî gazîya ma. Ma ra têna yew kes/e zî bimano, ma do çirey na hetkarîya gerîlayan xo vîr ra mekerê. Êzidîyî ça benê wa bibê ganî na roje xo vîr ra mekerê. Ma zanê kamî ma rotê û kamî ma xelisnayê.''