Şingalîjî ewro vera hêrişê  artêşa Iraqî  ke demo peyêne de zêdîyayî vejîyayîşî kuçeyan. Badê rayraşîyayîşî eşkerayîye ameye dayene.

Hetkarê Hemserekanê Meclîsê Xoserîya Demokratîke yê Şingalî Heso Îbrahîmî ard ziwan ke Şingal do reyna qûrbanê hesabanê sîyasîyan nêbo. Îbrahîmî vat: ''Ma hînî wayîrê hêzî yê. Dezgeh, meclîs û pawitişê ma esto. Tîya  dezgeh temsîlkarê heme şaranê Şingalî estê. Têna paştgêrê partîyêke nîyê. Ma nika semedê Asayîşê Êzidxanî tîya de yê. Eke 2014 de Asayîşê Êzîdxanî bibîyêne o ferman do nêameyêne qewimîyayene. Dadî û wayê ma qûrban nêbîyêne. Ma vera qanûnê Iraqî nîyê.  Ma têna çarçewa nê qanûnan de heqanê xo wazenê. Goreyê Qanûnê Bingeyî yê Iraqî heqê ma yê xoîdarekerdişî esto.  Xora seba ke şarê ma raştê qirkerdişî ame no heqê xoserîye dano ma.''

Badê na eşkerayîye Meclîsê Şingalî, TAJÊ û PADê ra heyetêk selahîyetdaranê Iraqî ameyî têhet. Pêvînayîş dewam keno. Şar verê Asayîşê Êzîdxanî de netîceya pêvînayîşî paweno.