Şirnex de şar vera şewatê Koyê Cûdîyî, qirkerdişê daran, talankerdişê xoza û operasyonê îşxalî yo ke 23ê nîsane ra nata yeno kerdene rayra şi.

Temsîlkarê partîyanê sîyasîyan û dezgehanê komelê sîvîlî û ekolojîstî zî tede bi seyan kesê ke bajarokê Gundikê Melê yê Şirnexî de ameyî têhet ver bi Koyê Cûdîyî rayra şîyî.

Badê rayraşîyayîşî Parlementera HDPyî ya Adana Tulay Hatimogullari qisey kerd. Hatimogullari talankerdişê xoza sey sebebê krîzê ekonomîkî name kerd û vat: ''Îqtîdar pê rant û talanî wazeno sîstemê xo bido domnayene. Semedê çînkerdişê kerra, ko û herre heme metodî şuxulnayî. Xoza talan kenê. Cûdî de daran birnenê û tîya kalekol û quleyan virazenê.Coka herême de peynîya şewatî nêna.  Pê birnayîşê nê daran kurdan ra qesas genê. No têna problemê kurdan nê yê dinya yo. Meseleya esase haştîye ya. Ma hînî mergan û gonî ra qefilîyayî. Na cografya zî şîdetê ra qefilîyaye. Eke wina dewam bikero hinî semedê awe şerî vejîyenê. Ma do semedê  haştîye têkoşînî rê dewam bikerê.''

Dima ra Hemserekê KCDyî Berdan Ozturkî qisey kerd. Ozturkî vist vîrî ke şerêko leymin yeno rayraberdene û vat: ''Xozaya ma talan kenê. Nê şêrî ra ziraro tewr pîl xoza  vînena. Semedê rantî xoza talan kenê.  Na xoza têna ê kurdan nêya. Pê vêşnayîş û talankerdişî şima mîrasê merdimîye çîn kenê. No qirkerdişê xoza semedê ameyoxê merdimîye tehdît o. Ma nê qebul nêkenê. Ganî şarê Tirkîya zî vera nayî vengê xo berz bikerê. Heta ke meselaya kurdî çareser nêbo talan û qirkerdiş zî nêqedîyenê. Ma tîya ra rena veng danê; wa şarê Tirkîya semedê çareserkerdişê meseleya kurdî vengê xo vejo. Ganî tecrîdê serê Rayberê PKKyî  Abdullah Ocalanî bêro wedaritene. Ganî warê azadîye bêrê akerdene û kaos bêro qedînayene. Ma têna vera qirkerdişê Kurdîstanî nê ma vera heme neheqîyan ê ke Tirkîya de ciwîyene têkoşîn kenê. Bêrê ma vera nê qirkerdiş û talanî têkoşînê hemparî bikerê.''

Badê qiseykerdişan çalakîya roniştişî ameye kerdene. Çalakîye bi deyîranê cayîyan û sloganan qedîyaye. Heyetê semedê zîyaretkerdişê esnafî şi merkezê Şirnexî.