Endamê Komîteya Merkezî ua PKKyî Kasim Engîn (Îsmaîl Nazlikul) 27ê gulane de hêrişê hawayî de Biradost de gerîlatîya Têkoşînê Azadîye ya 35 serran temam kerde û bi şehîd. 

Kasim Engînî qala cuya xo ya ke Bazarixê Gumgumî ra heta Almanya û Almanya ra heta koyanê Kurdîstanî derbaz bena wina kerdêne:

''Ez serra 1966î de Bazarcix de dadîya xo ra bîya. Ez yew-di serre Bazarcix de şîya dibistane.Serra 1975î ra dima ma keyeyê xo hewilna Almanya. Uca de ez hema hema 15 serran ciwîyaya û dima 90an de ameya welat. Welat de dinyayê cîyayî estê. Wexto ke mi dest pê dibistane kerde, tirkî nêzanayêne.  Naye ra ez kuwayêne. Uca de reya verêne merdim şikîyeno. Dima Almanya de şikîyayîşo hîrêyîn. Alman, kurd, tirk; kesayetêko hîre parçeyîn. 

Mi Almanya de dest pê lîseyî kerd. Ez serkewte bîya, mi futbol kay kerdêne. Mi beşanê bînanê sporî de zî ca girewtêne. Beno ke no şeqizîyayîşê ma ra wina bi. Yanî ti nêeşkîyenî kurd be, turk be, xora ti alman zî nîyî. Mi no hîs vurna enerjî. Dima zanîngeh de mi beşê komputerî wend. Ma ziwanê înan musayî.

Heta serra 85î mi xîret kerdêne ke sey yew alman têbigêra. Wexto ke Macarîstan de ma rê pasaport ame waştêne ez hînî pê hesîyayî ke tîya de yew şaşîye esta. Ti vanî qey ti alman î la raştîye vejîyena verê to. Serra 85î wina bîye. Mi hem xo qebul nêkerdêne hem zî nasnameyê xo nêzanayêne. Merdimê ke kultur û nasnameyê xo nêzanenê nêeşkenê merdimanê bînan de têkilîyêka zixme ronê. Serra 85î de vurîyayîşê mi dest pêkerd.

Keyeyê ma de milîtanê Apoyî estbî. Koyan de keyeyê ma ra gerîlayî estbî. Wexto ke ez mekteb de ser kewta têgêrayîşî ra bîya dûr la serra 85î de ez reyna agêraya kokanê xo ser.

Serra 88î de ez Almanya de sporê kickboksî de bîya verên. Kickboks û tekvando de 9 hebî xelatê mi estê. Zanîngeh de ez lîsteya serkewteyan de hîrêyîn bîya. 

Tewrbîyayîşî ra verî komêka ma estbî. Ez û Şehîd Erdal (Engîn Sîncer) ma pîya bîyî pîl. Ma domanî, ciwanî û milîtanîye de embazê yewbînan bîyî. Koma ma serranê 86 û 87î de aktîf bîye. Koma ma domananê karkeran ra ameyêne meydan. Bi desan kesî tesîrê na kome de mendî û tewrê gerîlayan bîyî.

Erdal mi ra pîlêr bi, her kesî ci ra zaf hes kerdêne. 

Serra 78î de Mehmet Dîrlîk Çewlîg de bi hawayêkê barbarî amebi qetilkerdene. Rayraşîyayîşo verên  Bazarcix de seba xalê mi amebi kerdene. Ez serra 1993î de şîya gorê ci ser. Kerraya gorê ci ser de 'Şehîdê azadî û xoserî Mehmet Dîrlîk bêmerg o' nusîyayêne. Mi serê gorê ci de sond wend ke ez do qesasê ey bigêra. Mi vat 'Ez do qetî şora koyan.'

Serra 1989î de ez tewrê gerîlayan bîya. Dima ez şîya herêma Rayberîye. Wexto ke ma Efrînî ra derbaz bîyêne ez wesayîtî ra ameya war û lew naya erdê Kurdîstanî ro. Agêrayîşê welatî cigêrayîşê nasnameyî bi.  Yewîya min a bi koyan wina bîye. Heta ke nêzdîbîyayîşo têdûşt bêro caardene ez tîya de ya. Ma nêverdenê ke yewna kes nê giran ra biewno.

Wexto ke ez tewrê gerîlayan bîya mi keyeyê xo ra xatir nêwaşt la ez şîya keyeyê Erdalî. Dadîya Erdalî mi rê vat ke 'Ganî ti zixm be, ti bibe rûmetê ma. No wezîfe de bêbêxtî nêbena.' Wesîyetê dadî û babîyê Erdalî wina bi.

Erdal serra 94î de Çirav de bi. Mi embaz şehîd Jîyanî rê qala Erdalî kerdêne. Mi dî ke Erdal ho yeno. Rengê ma vurîya. Ma têna dest da yewbînan. Ma şok bibî. Mi dima vîrameyîşê xo de nuşt ke a hele mi zaf waştêne verar şora Erdal. Dima wexto ke Erdalî vîrameyîş wend huya û vat ey zî heman çi waştêne. 

Serrêke ra dima kongre de ma ameyî têhet, dima zî taburê ma ameyî têkişt. Serranê 94-95-96-97î de ma tim bîya bîyî. Çend serran ra dima ma Şehîd Ayhan de yewbînî dî. Ez dibistana kurdkî de bîya, vejîyaya cor. Pê cîhazî venga mi da va wesayît ameyo, o ho şino. Ma yewbînan ra xatir nêweş û ma dima tewr yewbînî nêdî.

Ez Bazarcixî ra ya. Ma heyranê kurdkîya xo bîyî. Ma kurdayetîye sero bîyî pîl. Ez bi serran o ke koyan de ya. Ez kesa tek a ke welatê teberî ra tewr bîya la hema zî tîya de ya. Nîyetê mi no bi ke ez nê rekorê xo destî ra meveja. Mi û Erdal ma soz dabi yewbînî ke 'Ma do nêkewê.' La Erdal netîceya qezayêkê xirabî de şehîd bi.

Seba mi vêşanî, têşanî, rincanî û serd zehmet nîyê. La ewnîyayîşê Girê Golgata zehmet o. Xora zehmetîya şorişgêrîye esta. Şorişgêrîye xora heqê nê zehmetan ra ameyîş o. Êyê ke her roje xo nêafernenê nêeşkenê ver bi Golgota şorê. Şehîdî, Rayberîye, hêvîya şarî çimeyê ma yê hêzî yê. Seba mi Erdal çimeyê hêzêkî yo taybet o.  Coka pê nê hêzî ver bi Golgota şîyayîş bi xo şorişgêrî ya. Şorişgêrî hunerê ver bi Golgota şîyayîşî yo. 

Ez ameya koyan ke xo reyde bêra têhet. Zerrîya mi de Kurdîstan esto, bengî esta, heskerdiş esto, azadî esta, sosyalîzm esto, cigêrayîş esto, heskerdişê welatî esto la serê nînan pêroyînan de ez esta. Ez seba xoperestî naye nêvana. PKK têgêrayîşê xovînayîş û destvistişê nasnameyê xo yo.''