Endamê Dîwanê Hemserekîye yê KCDyî Adnan Akgulî vera hêrişanê dewleta tirke yê serê Mexmûr, Şingal û Herêmanê Pawitişî yê Medya nêrazîbîyayîşê xo mojna û vat: ''Ganî ma pê yewîye cewabê tewr xurtî bidê hêrişan.''
Endamê Dîwanê Hemserekîye yê Kongreya Komelê Demokratîkî (KCD) Adnan Akgulî hêrişê teyarayanê şerî yê Tirkîya yê vera Şingal, Mexmûr û Qendîlî ANFyî reyde ercna.
Akgulî ard ziwan ke Tirkîya polîtîkaya dişmenîya kurdan de israr kena û vat: ''Vera xeylêk kampan 11 mengan ra nata ambargo esto. Şarê kampan tedaya dewleta tirke ra koç kerd û nê kampanê Başûrê Kurdîstanî de manenê ke roja destpêke ra nata yenê hedefkerdene. La şarê ma yê kampe tim têkoşîn kerd. Hêrişê peyênî yê Tirkîya de cinîyan ê sivîlan dinyaya xo bedilnaye. Hêrişê Tirkîya yê vera şarê ma israrê dişmenîya kurdan o.
AKP xîret keno ke pê nê hêrişan payan ser o bimano. Roja rayraşîyayîşî mojna ke kamî terefgîrê şerî yê û kamî terefgîrê haştîye yê.Heta ke bireso armancê xo rayraşîyayîşê HDPyî do dewam bikero. Bombardumanê Kampa Mexmûrî ya ke binê pawitişê Neteweyan ê Yewbîyayeyan de ya, sûc o la seba Tirkîya na girîng nîya. Îqtîdar hêrişê kurdan, Şingal, Mexmûr û Qendîlî keno. Aseno ke îqtîdar pê nê hêrişan peynîya xo ano.
Hetêk de Rojawan de seba yewîya neteweyîye xebate yena kerdene û Vakur de zî heman xebate dîyena dewamkerdene.Ganî kurdî vera nê hêrişan yewîya xo awan bikerê. Bi nê hewayî cewabêkê tewr xurtî do bidê.
Ma nameyê KCDyî ser o hêrişê vera Mexmûr, Şingal û Qendîlî şermezar kenê. Şingal û Mexmûr binê pawitişê Neteweyan ê Yewbîyayeyan de yê. La Neteweyê Yewbîyayeyî vera hêrişan bêveng ê. Ganî rêxistin, dezgeh û hêzê neteweyî û mîyanneteweyî tewirê xo bimojnê. Hukmato Federal ê Başûrê Kurdîstanî û Iraq ganî bi hawayêkê xurtî nê hêrişan şermezar bikerê û vera hêrişan bivejîyê meydanan.''
