Kurdîstan û Tirkîya de tedayê vera rojnamegerîye roje bi roje zêdîyenê. Hemserekê Komeleya Rojnamegeran ê Dîcle-Firatî (DFG) Serdar Altanî derheqê teda û zorbazîya vera rojnamegeran û rewşa çapemenîye de ANFyî rê qisey kerd.

Altanî da zanayene ke îqtîdarê AKP-MHPyî 20 serrî yo serê hukmatî de yo û bi taybetî serranê peyênan de xîret keno ke vengê çapemenîya azade bibirno. Altanî vat: '' Îqtîdar wazeno çapemenîye ra dima vengê medyaya dîjîtale zî bibirno. Seba ney zî qanûnanê neweyan vejeno la reyna zî pê çapemenîya azade nêeşkeno. Coka hukmat çapamenîya azade hedef keno. Tirkîya de rojnamegerîye sey sûcî dîyena. Îqtîdarê AKP-MHPyî wazeno sey dezgehanê bînan çapemenîye zî girêdayeyê ci biba. Seba ke nêeşkena ney bikero vera ma zulm keno. Rojnameherî yenê destbenkerdene, tepiştene û maruzê îşkence û astengîyan manenê. Vîrameyîşê qurbananê Qirkerdişê Pirsûsî de û çalakîyanê vera nîjadperestîye de 31ê temmuze de rojnamegerî reyna maruzê hêrişanê polîsan mendî. Nê pêro kerdişî raporanê komeleya ma de eşkera yê.''

Altanî eşkera kerd ke rojnamegeran rê ajanîye yena ferzkerdene û vat: ''Kuçeyan de rojnamegerî pê wesayîtanê sivîlan yenê remnayene. Polîsî û endamê MÎTî nê çîyan kenê. Nê kerdişê îlegal û bêexlaqî yê. Ma nê nêzdîbîyayîşê dewlete şermezar kenê. Se beno wa bi çapemenîya azade do tawîz mede û raştîyan komelî rê pêşkêş bikera.''