Amed de Platformê Demokrasî yê Herême ke 21 bajaran ra  34 dezgehê komelê sîvîlî tede ca ganê verê Vîrdarîya Heqanê Merdiman a Parka Koşuyolu de waş t deklerasyonê xo eşkera bikerê. Polîsan verê eşkerayîye parke girewt binê ablûqa û destûrê eşkerayîye nêda.

Platformî qerar girewt ke eşkerayîye Cemîyetê Rojnamegeran ê Başûrêrojhelatî (GGC) bidê la heta ke resayê ûca çend rey raştê hêrişê polîsan ameyî. Polîsan destur nêda metnê çapemenîye bêro wendene. Nayî ser o bi nameyê platformî Endamê Heyetê Rayraberdişî yê Odaya Muhendîsanê Madenî yê Amedî Dogan HatUnî kilm eşkerayîyêke daye.

Hatunî veng da Walîtîye û Serdozgerîya Komare ya Amedî û vat: ''Ma sey 344 rêxistinê komelê sîvîlî ameyî pêser û waşt ke heqê xo yê demokratîkî bişuxulnê û bîyarê ziwan ke ma senî yew qanûnê bingeyî wazenê. La ewnîyayîşê şima ê qanûnê bingeyî senî ke şima  tîya ma rê tecrîd îzolasyon kenê wina yo. Ma dişmen nîyê, wayîrê nê bajar û komelî yê raştikên ma yê. Ma vervatoxê nê bajarî yê.''

Badê eşkerayîye pê çalakîya roniştişî tewirê polîsan ame şermezarkerdene. Çalakîye de sloganê sey ''Wa biciwîyo xoverdayîşê azadîye'', ''Wa bimiro faşîzm'', ''Heq, huqûq, edalet'' ameyî vatene.

Metnê çapemenîyo ke destûr nêdîya bêro wendene rojnamegeran rê ame vilakerdene ke tede nê ameyî vatene:

''Hukmatî bi polîtîkaya hêrişkare welat fînayo mîyanê krîzî. Komelo sîvîl yeno fatisnayene û azadîya îfedeyî û medya binê tehdît de yê. Rixmê qerarê Mehkemeya Heqanê Merdiman a Ewropa (MHME) rayberê partîya muxalîfe zîndan de yo, qefilnayîşê partîye rojdem de yo, qeyûmî sey çîyê normalî dewam kenê û  hukm xoser nîyo. Wexto wînayên de viraştişê qanûnê bingeyî yê neweyî mumkun nîyo û reformî ra zî çew bawer nêkeno. Ganî viraştişê qanûnê bigeyî de partîye sîyasîyî, baroyî, odayê karî, dezgehê komelê sîvîlî ca bigerê. Serê de meseleya kurdî de semedê haştîya demokratîke ya mendîye no tercîh ne mecburî yo.

Ganî qerarê MHME cade bêro caardene û waştişê tepişteyanê ke zîndan de grevê vêşanîye de cade bêrê caardene. Ma veng danê hukmat, Wezîrîya Edaletî û dezgehanê eleqedaran ke wa binpaykerdişê heqan, tecrîd û îzolasyonî helêke cuwar wedarî .''