Kongreya Komelê Demokratîkî (KCD), DBP, Têgêrayîşê Cinîyan ê Azadan (TJA), Mayanê Haştîye, MED-TUHADFED, MEBYA-DER, Partîya Azadîye û Merdiman (PÎA) Buroyê Paştdayîşî yê Merkezê Pêroyî yê DBPyî yê Rêzanê Amedî de derheqê hêrişanê PDKyî yê Herêma Kurdsîtanî de eşkerayîye daye û semedê yewbîyayîşê kurdan veng da.

Hemserekê KCDyî Berdan Ozturkî eşkerayîye kurdkî wend. Ozturkî bale ante ser ke semedê kurdan senî ke firsetê tarîxî yê azadîye est ê, tehlukeyê girdî zî est ê û nê vatî: ''Ma ganî nê prosesî de wayîrê destkewteyanê xo bîvejîyê.  Ma xeylêk wexto ke semedê yewîya kurdan cehd kenê.  Hema zî tesîrê birakujî û pêkewtişê mabênê kurdan ma ser est o. Sey vizêrî ewro zî pêkewtişê mabênê kurdan tewr zaf zirar dano kurdan. Dişmenê kurdan kenê ke kurdan biverdê pê. PDKyo ke paştî dano polîtîkayanê vera kurdan yê AKPyî ganî berpirsîyarîya xo bîyaro ca, ganî reyna sey verî zirar medo kurdan.

Şarê kurdî tim her dewrî de têkoşîno xurt rayra berd. Kurdî bi bedelan girdan resayî bertengê haştîye û azadîye. Wextê wina muhîmî de êyê ke benê aletê polîtîkayanê dewletanê serdestan do tarîx de sey nuşteyê sîyayî bimanê. Ma veng danê şar, heme hêzanê Kurdîstanî, roşnvîr û hunermendanê xo ke wa semedê pawitişê destkewteyanê şarê ma têbigêrê. Beno ke siba zaf erey bo, ganî ma ewro pîya têbigêrê. Sey Kobanê ma eşkenê bi yewbîyayîşî ser bikewê. Roje roja bi heqîqatî ver bi azadîye rayraşîyayîşî ya.''

Eşkerayîye de ame vatene ke siba do derheqê na babete de verê berê sînorî yê Sîlopî de eşkerayîye bêro dayene û semedê tewrbîyayîşî ame vengdayene.