Amed de Hemsereka Pêroyî ya HDPyî  Pervîne Buldan partîyanê Îtîfaqê Kurdîstanî reyde kombîyayîş kerd. Badê kombîyayîşê pîya bi pabesteyanê kombîyayîşî startê Newroza 2021î dîya. Newroze 30ê înan bajarî  do 61 merkezan de bêro bimbarekkerdene

Haştîye pê dişmenîya vera kurdan nêbena

Buldane  Newroze bimbarek kerd û vat: ''Xora seke  yeno zanayenê ma par Newroze rîyê Korona ra bimbarek nêkerd. Newroza tewr bicoş ya 2013yî bî.  Semedê ameyoxê şaran Newroza 2013yî tarîxî bî.  Deklerasyonê birêz Ocalanî ke xitabê mîlyonan kerdêne Amed de ame wendene. Eke a roje vatişê ê deklerasyonî biamêyene caardene ewro qewimîyayîşê ke Tirkîya û Rojhelatê Mîyanênî de benê, do nêbîyênî. Coka ganî tecrîdê serê birêz Ocalanî cade bêro wedaritene. Şarê Tirkîya haştîye wazenê. Haştîye pê dişmenîya vera kurdan nêbena. Pê qedexekerdişê ziwan, nasname û kulturê kurdan haştîya komelkîye nêbena. Eke ma nasname, kultur û ziwanê yewbînan rê hurmet ramojnê haştîye wina yena. Ma hêvî kenê ke no roşano qedîm nayî rê wa bibo wesîle.''

Ma do adirê Newroze gir bikerê û tecrîdî bişiknê

Hemserekê Pêroyî yê KCDyî Bedran Ozturkî zî bale ante ser ke vera çar leteyanê Kurdîstanî hêrişî estê û vat: ''Ê çend hêriş bikerê do hende lez biqedîyê. Newroze têna ameyîşê wisarî nîyo. Çend Dehaqî estî hende zî vera înan Kawayê Asinkarî estê û resayî serkewtişî. Ma do emser adirê Newroze gir bikerê û tecrîdî bişiknê.''

Na Newroze do bibo wesîleya yewîya kurdan

Hemserekê Pêroyî yê DBPyî Keskîn Bayindirî zî vat: ''Newroza emserî do seba kurdan bibo destpêkerdiş. Na Newroze do bibo wesîleya yewîya kurdan. Ma  sey partîyanê kurdan yewîye rê hazir ê. Şarê ma zî ganî pê kincanê xo yê neteweyîyan vera qirkerdi hêrişê îmhayî pê ruhê xoverdayîş tewrê Newroze bibo. Coka tewrbîyayîşê Newroze zaf muhîm o. Newroz bimbarek bo.''

Ganî kurdî bibê yew

Hemserekê Pêroyî yê KKPyî Sînan Çîftyurekî zî vat: ''Şarê kurdî ke seserrî yo tim raştê qirkerdişan yeno, Newroze de vîardişî keno, destkewteyanê xo bimbarek keno.  Mesajanê sîyasîyan ê muhîman dnao. Serra 2021î semedê şarê kurdî zaf muhîm a. Ganî kurdî bibê yew la ma nêbenê. Coka mesajo tewr muhîm ê na Newroze yewîya neteweyîye ya kurdan a.''

Statû pê yewbîyayîşî beno

Hemserekê Pêroyî yê Partîya Azadîye Ayettulah Aşîtî zî ard ziwan ke heta şarê mazlûmî mebê yew serkewtiş nêbeno û vat: ''Ewro her kes merdeyê xo rê bermeno. Eke kurdî wazenê bibê wayîrê statûyî ganî bibê yew. Eke ma yew mebê  ma do serkewtişî zî nêvînê.''

Deyîra Newroze: Dîsa Li Newroza

Çarçewa şayîyanê Newroze de deyîrêke zî ameyî amadekerdene. Klîbê deyîra Newroza ke hetê Mihemedê Pirosî ra ameye nuştene dîya nasdayene. Deyîrê hetê hunermendan Dîlane Yigit, Jîyan Savci, Cejna Saruhan, Kadir Çat, Umut Botan, Murat Bakrak, Devrim Ozluk, Mêrxas Vîyan û Merve Admiş ra ameye vatene.