Amed de hetê Partîya Çep a Keske û HDPyî ra bi şîarê ''Semedê haştîya komelkîye cuyeya seycîye û azade'' mîtîngê 1ê Êlule ame kerdene. Mezdanê Îstasyonî ke tede mîtîng ame kerdene bi bayraqanê partîye û pankaratanê waştişê haştîye û  mesajê xoverdayîş û têkoşînî ame xemlnayene.

Hemvervatoxa Partîya Çep a Keske Çîgdeme Kiliçgun Uçar, Hemsereka Pêroyî ya DPByî Salîha Aydeniz û wekîlî Adalete Kaya, Halîde Turkoglu, Newroze Uysal û cinîyê TJA bi pankartê “Jin, jiyan, azadî”  û  “Cinîyan ê tepişteyan rê azadîye” ver bi warê mîtîngî rayra şîyî. Wextê rayrşîyayîşî de sloganê sey “Jin, jiyan azadî” û “Berxwedan jiyan e” ameyî vatene û venê tîlîlîyan bi berz.

Polîsanê tirkan ke di nuqtayanê cîyayan de cigêrayîş kerd dest na qelemanê rojnameran ser û destur nêda kincanê şal û şapikî. Hewtî ra heta hewtayî şarê ke verê xo da Meydanê Îstasyonî bi slogana ''Serkêşê haştîye Îmrali de yo'' vate.

Hemserekê KCDyî Berdan Ozturk, Hemvervatoxa Partîya Çep a Keske Çîgdeme Kiliçgun Uçar, Hemsereka Pêroyî ya DPByî Salîha Aydeniz, wekîlî û bi hezran kesî tewrê mîtîngî bîyî. Verî bi marşê Çerxa Şoreşê rêz ame girewtene. Ciwanî bi slogananê ''Ciwanî fedayîyê Apoyî yê'' û ''Ma do bi xoverdayîşî ser bikewê'' qîrayî.

Badê qiseykerdişê akerdişî Berdan Ozturkî qisey kerd. Ozturkî qala tarîxê 1ê Êlule kerd û nê vatî: ''Kurdîstan de şarê ma 100 serrî yo semedê azadîye têkoşîn keno. 50 serrî yo şarê kurdî zano ke çiwex firset bikewo destê Birêz Abdullah Ocalanî, o cade wazeno semedê haştîye bişuxulno  Îqtîdarê AKP-MHPyî seba ke nê biqedîno tecrîd xorî kerd. Zîhnîyetê Hîtlerî dewam keno. Farqîn, Tetwan û Qelqelî gênê binê ablûqa û bi îşkenceyî şarî destbend kenê.  Ma nê zulmanê vera şarê Kurdîstanî qebul nêkenê. Şima pê şerî nêeşkenê ma biqedînê. Ewro fîkrê Abdullah Ocalanî heme dinya rê vila bîyî. Ma semedê haştîya birumete kewtê rayîr. Ma zaf bedelê giranî dayî ma do heta azadîye zî nê bedelan bidê. Meseleya kurdan ewro tesîrê Rojhelatê Mîyanênî zî kena. Eke şima ewro nêeşkenê nana bêrê keyeyê xo, sebebê nê zîhnîyeto faşîst o. Destê haştîye yê Abdullah Ocalanî tepişê. Eke şima o destî tepişê, haştîye yena. Heta ameyîşê haştîya birumete ma do têkoşînî rê dewam bikerê.''

 Çîgdeme Kiliçgun Uçar zî 1ê Êlule Roja Haştîye ya Dinya pîroz kerd û nê vatî:  ''Ma haştîye û şerî zaf hole zanê. Waştişê dewlete oyo ke kurdan asîmîle bikera. 100 serrî yo kenê kurdan têna verdî. Şarê kurdî vera nê 100 serrî yo xover dano. No xoverdayîş îradeyê ma yê haştîye xortêr keno. Ma na roje dîyarîya Dayîkanê Haştîye yê ke Colemêrg de dinyaya xo bedilnaye, kenê. No qeza nêbi, cînayet bi. Rîyê krîzê ekonomîkî ra wayîrê banî û cîranî yewbînan mirnenê. Şar xo kişeno. Îqtîdar binê versîya şerî de haştîye sey xeyalî mojneno ra. Birêz Ocalan vano o eşkeno hewteyêk de na mesele çareser bikero  la dewlete vera nê tecrîdî xorî kena. Kenê ke şexsê Birêz Ocalanî de kuran bigêrê binê tecrîdî la do sernêkewê. Hakan Fidan ber bi ber gêreno ke kurdan biverdo pê la ê do ser mekewo. No îqtîdar komelî jehr keno. Şarê kurdî yo ke dinya de wina semedê haştîye têkoşînê xurtî keno vera yewbînî şer nêkeno. Ma do bibê yew haştîye bi destê xo bîyarê.''