Polîsan serê sibayî eşt bînaya Komeleya Keyeyanê Tepişteyan TUAY-DERî û keyeyanê îdarekaranê komele ser. Polîsan sereştişanê keyeyan û komele de pê zorî berî akerdî û 6 endam û îdarekarê komele dest bend kerdî.

Polîsan Hemserekê TUAY-DERî Mehmet Emîn  Guzel, endamê TUAY-DERî Muşeher Ulker, îdarekaro verên ê TUHAD-DERî Menaf Kur, endamê Meclîsê Şaredarîya Rezanî ya Amedî Abdulvahît Dogru, Îdarekarê TUAY-DERî Şafî Hayme, îdarekara TUHAD-DERî ya verêne Leyla Ayaz dest bend kerdî.

Keyeyan pare kerd ke polîsan keyeyî serûbin kerdî û endamanê keyeyî rê şîdet kerd. Ame parekerdene ke polîsan eşt xeylêk keyeyanê bînan zî ser.

Hetê bînî ra merkezê Bedlîsî û qezayanê ci de zî vera HDPyî operasyonê qirkerdişê sîyasîyî ame kerdene.

Sereştişê keyeyan de  endamê merkezê partîye avûkat Dîyar Orak, hemsereko verên ê partîye yê bajarî Orhan Bezîrganoglu, Îdarekaranê verênan ê partîye ra  Gunay Karabaş, endamo verên ê meclîsê Şaredarîye yê HDPyî  Ferda Avkan û Elîf Orman Erez  ameyî destbendkerdene.