Gerîlayê HPGyî Mahsum Aslan menga hezîrana 2018 de Koyê Sûrî yê Dêrsimî de hêrişê hewayî yê artêşa tirke de şewîd kewtbi. Serdozgerîya Komere ya Erzînganî cenazaya Aslanî pê kargoyî Mudirîya Asayîşî ya Erganî rê şawitbî.

Amed de seba ke pê kargoyî şawitişê cenazayan bêro şermezarkerdene eşkerayîyêke ameye organîzekerdene.

Komeleya Kultur, Yewîye, Paştdayîş û Hetkarîye ya bi Keyeyanê ke Dergûşê Medenîyetan de Merdimê Xo Vînî Kerdî (MEBYA-DER) verê Vîrdarîya Heqanê Merdiman a Parka Koşuyolu de waşt eşkerayîye çapemenîye bido. Îdarekarê DBP, HDP, aktîvîstê TJA, û îdarekarê Komeleya Heqanê Tepişteyan û Paştdayîşê Keyeyan a Amedî (TUAY-DER) û Îdarekarê Federasyonê Komeleyanê Huqûq û Paştdayîşî yê Keyeyanê Tepişteyan û Hukmwerdetan ê Medî (MED TUHAD FED) tewrê çalakîye bîyî. 

Polîsan dormeyê şari girewt û destûr nêda eşkerayîye bidê. Nayî ser grûbe bi çalakîya roniştişî tewirê polîsan şermezar kerd.