Tirkîya û Vakurê Kurdîstanî de bêkarî û xizanîye her roje zêdîyena. Bi taybetî Amed de rewşe xirabêr a.  Amedijan derheqê babete de ANFyî rê qisey kerd.

Eren Fîdanboy: ''Seke cuya mi çin a. Cîyefê mi de çend qurişî estê. 4-5 mengî yo ez karî ra ameya vetene, ez nêeşkena nan bera keyeyê xo. Ma keye de 9 kesî yê, ez zewijnaye ya û 3 domanê mi estê. Wexto ke ez bixebita zî pêro pereyê mi şino fatura û kîrayan.''

Şeyhmûz Kaya: ''9 serrî yo ez seba karî mucacatê IŞ-KURî kena la karêk nêkewt destê mi.10 serran ra nata mi hemaltîye ra ber çîyêk nêkerd. Ma pê meaşê teqawutî yê babîyê mi xo devirnenê.''

Zekî Bozan: ''Wekîlêkê AKPyî vatbi xebatkarê pakîye 3 mengan de yew telefonê xo vurnenê. Wa o bêro mîyanê nê şert û mercan de bimano hela eşkeno debarê xo bikero. Ma keye de 8 kes ê û pê budçeyêka qije xo devirnenê. Kam vajo 'ekonomî hol a' zûrêka pîle keno.''

Mehmet Resûl Bozan: ''Ma nêeşkenê goşt bidê domananê xo. Xora ma sey şar musayîyê şikrkerdişî yê. La televîzyonan de ê rewşa merdiman nêvînê. Çunke her çîyê înan esto. Merdim hînî xo ra perseno vano 'gelo ez dinyayêka cîya de ciwîyena?' ''

Mahmût Ekelîk: ''Ez wextêk keyeyê xo reyde menda. Nika xizanîye ra ez tim teber de manena. Halê mi perîşan o. Kes kar nêdano mi. Hînî psîkolojîya mi xeripîyaye. Sebebê ci zî selahîyetdar ê.''