Amed de seba balantişê serê grevê vêşanîye yo ke vera tecrîdê Îmraliyî yeno kerdene çalakîyêke ameye kerdene. Wekîla HDPyî Remzîye Tosune veng da ke vera tecrîdî û grevê vêşanîye wa bêveng nêro mendene.
Grevê vêşanîyo ke zîndanan de vera tecîrdê serê Rayberê Şarê Kurdî Abdullah Ocalanî dîya destpêkerdene roja 104. de dewam keno. Rêxistina HDPyî ya Amedî seba ke bale bianco grevî ser waşt ke verê Vîrdarîya Heqanê Merdiman a Parka Koşuyolu de eşkerayîya çapemenîye bido. Polîsan parke girewt binê ablûqa û destûr nêda.
Remzîye Tosun vera nayî hersê xo ard ziwan û vat: ''Ma ganî vera tecrîdî bêveng memano. Eke ma bêveng bimanê no tecrîd do heme welatî ra vila bo.'' Gama ke Tosune qisey kerdêne polîsan destûr nêda rojnamegerî dîmen biancê. Badê qiseykerdişê Tosunu grûbe pê sloganan xoverdayîşê zîndanan selam kerd û çalakîya roniştişî ya kilme kerde
