Endama Komîteya Zîndanan a PAJKî Berbihîve Amed derheqê teda û zorbazîya zîndanan de ANFyî reyde qisey kerd.

Qiseykerdişê Amede ra beşêk wina yo:

''Îmrali de konseptêkê şerê taybetî yeno caardene. Rayberîye sey esîr yena tepiştene. Îmrali de huqûqê şerî yeno xebitnayene. Seba ke ma Rayberê xo ra xebere bigêrê ganî ma sey şar û têgêrayîş xo ver bidê, têkoşîn bikerê. No vera îradeyê qirker û faşîstî yê dişmenî şerê îradeyê kurdan o. Dewleta tirke seke kurdî sûcdarê potansîyelî yê nêzdîyê ci bena. Vera kurdan polîtîkaya dişmenîye yena caardene. Sey komelê kurdan tepişteyê şorişgêrî zî pê têkoşînêkê rûmetînî xo ver danê. Prosesê janî de zî têkoşînî dewam kerd.

Goreyê raporanê Wezaretê Edaletî 13 serranê peyênan de 2 hezar û 300 tepişteyî merdî. Merdimê wayîrwijdanî pê na hûmara ganî şoq bibê. Yanî 13 serran de her di rojan de yew tepişteyêk/e merd/e. No yeno a mana ke ma verê mergî de yê. Xora doneyê Wezaretê Edaletî zî mojnenê ke qirkerdişêk esto

Goreyê heman doneyan nika 620 tepişteyê nêweşî estê û înan ra 200 tepişteyî rewşa înan a weşîye giran a. Goreyê doneyanê Komîsyonê Zîndanan ê Komeleya Heqanê Merdiman 1334 tepişteyê nêweşî estê ke Dezgehê Tipê Edlîyî rapor da înan ke nêeşkenê zîndan de bimanê. Yanî vatişê 'bi hezaran tepişteyê nêweşî binê tehlukeyî de yê' propaganda nîya. La nê kesî hema zî zîndan de yenê tepiştene. Wazenê nê tepişteyê ke zafêrî sîyasî yê, wa bimirê. Dardekerdiş qaşo wedarîyayo. La nika oyo ke qewimîyeno dardekerdiş o.

Zîndananê Tirkîya û Îran de vera tepişteyan teda û kerdişê faşîzanî estê. La vera nê kerdişan zî tim xoverdayîş esto. Mîsalê naye zî Zeynebe Celalîyan a. Zeynebe Zînxanê Xoyî ra sewqê Zîndanê Qarakçakî bîye û pê vîrusê Korona kewte. Seba ke tedbîrê qîmî nêgêrîyayî, dest pê grevê vêşanîye kerd.

AKP-MHP hêrişê zîndanan kenê. Na babete de barêk keweno milê dezgehanê teberî û keyeyanê tepişteyan. Ganî nê polîtîkaya dewlete eşkera bikerê. Bi hezaran metodê ney estê. Na mesuldarîyêka merdimî, qijdanî polîtîk û komelkî ya ke ganî na bêhuqûqîye nêra qebulkerdene. Çalakîya tewr rind û raşte zî çalakîya seba azadîya tepişteyan ê sîyasîyan a.

Nê rojan de zîndananê Osmanîye, Hîlwan û Mêrdînî de tay tepişteyî grevê vêşanîye de yê. Ma çalakîyanê pê nê metodî raşt nêvînenê. Doreyê ma ganî pê metodanê cîyayan ê xoverdayîşî têkoşîn bêro kerdene. Herinda ke embazê ma yê tepişteyî grev bikerê, êyê ke teber de yê ganî xeta aktîfe ya çalakîyan awan bikerê. Gelo çita menda ke ma destî ra şora. Ma venga keyeyanê tepişteyan û şaran danê ke dormeyê zîndanan de çemberêka cuye awan bikerê.''