Şewatanê Antalya, Aydin û Mugla ra dima kurdî ameyî hedefkerdene û hêrişê nîjadperestî qewimîyayî. Tay komanê nîjadperestan destê înan de çeke, rayîrî birnayî û nasnameyî kontrol kerdî. Polîs û cendirmeyan qetî nê koman rê mudaxele nêker. Nê koman kurdî kerdî hedef, derb kerdî û kurdan rê gefî wendî. 

Amedijan Ajansê Mezopotamya rê qisey kerd û vera na rewşe nêrazîbîyayîşê xo mojna. 

Hemwelatî Hasan Pekerdîyî  vist vîrî ke hêrişê Konya de 7 kesî ameyî qetilkerdene û vat: ''La no qirkerdiş nêkewt rojdemê Tirkîya. Ê şewatî zî semedê rantî yê.''  

Abdurrahman Çakirî vat: ''Çita qewimîyeno ê erzenê milê kurdan. Çi eleqeyê kurdan pê nê şewatan esto?'' 

Mehmetşah Toprakî vat: ''Kurdî çira daristanan bivêşnê? Ma semedê xoza xo kişenê. Çend serrrî yo ma rê heman zulm yeno kerdene. Konya de 7 kurdî ameyî qetilkerdene çira çewî ra vengêk nêvejîya? Ma sey qurbanan hesibîyenê.''

Îkbal Ayazliyî vat: ''Nê şewatî kayê îqtîdarî yê. Dima ê do nê cayan de otêlan virazê. Şewatî zî erzenê milê kurdan.'' 

Bedîrhan Yaprakî vat: ''Kurdî daristanan nêvêşnenê. Derdê înan têna vilakerdişê nîjadperestî yo. Way û biratîye ça de ya? Eke ti nîjadperestî bikerî nêeşkenî qala wayûbiratîye bikerî.'' 

Aslan Yakutî vat: ''Ê şewatan erzenê milê kurdan û xo rê kenê hacetêkê sîyasî. Hêrişê nîjadperestî parçeyê ney ê. Ê bi nê hawayî nîjadperestîye gir kenê.''