Endamê Konseya Rayberdişî ya KCKyî Xebat Andokî tesîrê Hemleya 15ê Tebaxe yê serê Başûrê Kurdîstanî ercna. Qiseykerdişê ey ra tay noqtayê girîngî wina yê:

''Hemleya 15ê Tebaxe xeylêk tesîrê Başûrî kerdo. A roje ra nata tesîrê Hemleya 15ê Tebaxe, tesîrê PKKyî û tesîrê gerîlayan Başûrî ser o kêm nêbi zêdîya. Semedo ke Hemleya 15ê Tebaxe vera rejîmê dewleta tirke ameye kerdene mîyanê şarê Başûrî de pê kelecanî ameye pêşwazîkerdene. Çunke gerîlayî çar parçeyanê Kurdîstanî ra bîyî, mîyanê înan de ciwanê Başûrî zî estbîy. Şarê Başûrî gerîlayan de yewîya welatî dî û bi hezaran ciwanî tewrê gerîlayan bîyî.

Şarê Başûrî dî ke cuya gerîlayan û yê pêşmergeyan yewbînan ra cîya bîye. Cuya gerîlayan de fedakarî, exlaqo raşt, kedkarîye estbîy. Bi taybetî gerîlayan ê cinîyan, nêzdîbîyayîşê PKKyî yê bi cinîyan mîyanê şarî de reaksîyono pozîtîf vet werte. Merdim eşkeno vajo ke Hemleya 15ê Tebaxe Başûr de tesîrê her çîyî kerd. Şarê ma gerîlayan sey garantîya welatî û garantîya azadîya xxo vînenê. Gerîlayî û hêzê Başûrî yê ke têna menfaatê xo fikirîyenê şarê ma rê cîya yê.

PDKyî ra ber hêzê bînî yê Başûrî pê awanîya gerîlayan kêfweş bibî. Çunke înan PKK sey temînatê estbîyayîşê xo dî. PDKyî zaf xîret kerd ke hemleya 15ê Tebaxe asteng bikero la nêeşka. Dima zî zaf xîret kerd ke pê protokolan PKK xo rê girê bido ke vera dewleta tirke şer nêkero. La wina zî nêbi. Nê PDK zaf kerd teng. Coka PDK kişta dewleta tirke de seba tasfîyeya PKKyî ca girewt.

PKK pêro Kurdîstanî û kurdan yew vîneno û seba xelasê înan xebitîyeno. PDK zî Kurdîstanî sey parçekerde vîneno û semedê serdestîya xo şaristananê Kurdîstanî pêşkêşê dewleta tiirke keno. PKK vano kurdî eşkenê pê xopawitiş û pê hêzê xo azad bibê la PDK vano kurdî hewceyê hêzanê teberî yê. PKK rêxistinêka şorişgêr a la PDK xanedanêk o û wazeno tim bibo îqtîdar.

PDK bi xo binê serdestîya Gladioyê NATOyî de yo coka çarçewa NATOyî de têgêreno û keno ke PKK tasfîye bikero. PDK vano qey eke PKK tasfîye bibo ê eşkenê her çi bivisnê destî. Dewleta tirke qetî nêverdena wina bo. PDK semedo ke gerîlayan qels bikero nika dormeyê înan gêno. PDK hînî hêzêkê kurdan nîyo hêzê kolonyalîst û komplogeran o. PDK vano qey paştdayîşo ke dinya dana PKKyî tasfîyeya PKKyî ra dima do bêro dayene ci. Eke PKK tasfîye bibo peynîya PDKyî zî yena. PDK nika Başûr de pê paştdayîşê dewleta tirke gorê xo keneno. Şarê ma nê kerdişanê PDKyî vîneno û zaneno ke PKK asteng nîyo, hêzo azadker o. Coka şarê ma wazeno PKK Başûr de bimano.

PDK Başûr de xo ra ber hêzêk nêwazeno. Çimê şarî de hînî PDK qedîyayo. A raşte PDK o hêz nîyo ke bieşko payan ser o vindero. Tay hêzê teberî semedê tasfîyeya PKKyî PDK payan ser o vindarnenê.  Ma hêvî kenê ke PDK verê xo dano şarî, goreyê menfaatanê kurdan têgêreno û xîretê tasfîyeya PKKyî war verdeno. Nêbo kurdî bi xo azadîya xo do bivisnê destî. Dûrî de nê nêzdî de kurdî do cuya azad, têdûşt, demokratîke bivisnê destî, Kurdîstan do azad bo.''