Çalakîya 602. ya Merdimanê Vînbîyayeyan ê Şubeyê ÎHDyî yê Amedî de nê hewteyî aqîbetê endamê Partîya Kede ya Şarî (DEP) a Êlihî Aydin Ayo ke 10ê temmuza 1993î de ame remnayene û hema zî ci ra xebere nêna girewtene ame persayene.

Sekreterê Şubeyê ÎHDyî Yuksel Aslan Acarî pare kerd Aydin Ay debarê xo bi karkerîye kerdêne. Acarî da zanayene ke 10ê temmuza 1993î de saete 20:00-21:00 de keyeyê xo ra taxa 19ê Mayisî ra seba hêrînayîşê cixareyî vejîyeno teber  û hetê 3-4 kesanê sivîlan ra bi zorê çekan ame remnayene.

Acarî vat: ''Dadîya ci Remzîye Ay 3 rojan ra dima ke lajê ey yeno remnayene  şina Mudirîya Asayîşî ya Êlihî û seba lajê xo  14 rojan werde û kincan bena. Her roje polîsî serê ci de not nusenê û nê çîyan gênê. Roja 15. de polîso wezîfedar dadî Remzîye rê vano ke Aydin Ay nezaret de destê înan de nîyo. Remzîye Ay vînena ke werde û kincê ke rojêke verê cû ardbi serê mase de yê. Babîyê Aydin Ayî muracatê serdozgerîye keno la serdozgerîye qebul nêkena ke Aydin Ay destê înan de yo. Pêro xîretê keyeyî bênetîce manenê. Aydin Ayî rê 27 serrî yo ke xebere nêna girewtene.''