Fermandaranê Qerargehê Merkezî yê HPGyî ra Hakî Armancî Radyoya Dengê Gelî rê derheqê xoverdayîşê Herêmanê Pawitişî yê Medya û rojdemî de qisey kerd.

Qiseykerdişê Armancî ra tay noqtayê girîngî wina yê:

''Hêzê hegemonîkî wazenê ke bi tecrîdê Îmraliyî Rayber Apoyî ra qesas bigêrê. Ewro no tecrîdê şexsê Rayber Apoyî de vera pêro kurdan û şaran yeno caardene. Rayber Apo 25 serrî yo binê tecrîdêkê giranî de yo. Hîrê serrî yo destûr nêdîyeno ke o avûkatanê xo û keyeyê xo bivîno. Seba azadîya Rayber Apoyî 10ê teşrîna verêne de hemleyêka girînge dîyaye destpêkerdene. Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' seba pêro şaran zaf muhîm a. Şarê kurdî û dostê înan seba azadîya Rayberîye tim waran de yê. Ganî ma hîna zaf wayîra na hemle vejîyê û fikranê Rayberîye pêro dinya rê vila bikerê.

Vera Herêmanê Pawitişî yê Medya hêrişê artêşa tirke ya îşxalkere dewam kenê. A raşte têgêrayîşê ma erdlerzê 6ê Sibate ra dima bira adirbirnayîşî girewtbî û dima heta peynîya weçînayîşan adirbirnayîş kerdbi derg. Artêşa tirke ya îşxalkere ê prosesî de zî hêrişê xo zêdînayî.  A raşte dewleta tirke vatêne qey mîyanê çend mengan de Başûrî îşxal bikera. La bi taybetî wextê peyênî de artêşa îşxalkere gerîlayan ra derbê giranî werdî. Dewleta tirke kewta mîyanê yew tengîye ke nêeşkena tira xo veja. Gerîlayî rixmê hende teknîk, çekanê kîmyewîyan û bombardumanan zî xo ver danê û verê îşxalê dişmenî gênê.

Dewleta faşîste teyna Herêmanê Pawitişî yê Medya de ney Rojawan, Vakur û cayanê bînan de zî hêrişê têgêrayîşê ma û kurdan kena. 2023 de bi taybetî Vakur de şer zaf bi giranêr. Ma Vakur de embazê xo yê ercîyayeyî şehîd dayî. Dewleta qirkere kena ke Vakur de gerîlayan biqedîna. La Serhed, Xerzan, Dêrsim, Amed, Mêrdîn, Botan, Wan ûsn de gerîlayî xoverdayîşê fedayîyî kenê.

Dewleta tirke bi propagandaya zexte, zûran û polîtîkayanê şerê taybetî kena ke şarê ma rê tesîr bikera. Wa şarê ma pê zûranê dewlete mexapîyo. Gerîlayê Vakurî do tim est bê. Zimistan seba gerîlayan yeno manaya wextê perwerdeyî. Embazê ma weş û war resayî waranê xo û nika prosesê perwerdeyî de yê. Amadekarî û tedbîrê ma zixm ê. Tewirê embazanê ma yê Vakurî seba dewaya azadîye zaf girîng ê.

Zimistan de embazê ma ganî pê wesayîtan tênêgêrê. Dişmen gêreno firsendî ke bido embazanê ma ro. Tewr peyên Mêrdîn de embazê ma Rodî Nalîn, Herekol Hezex û Kurtay Şerzan netîceya dafika dişmenî de şehîd bîyî. Embazê ma wa tedbîranê xo xurtêr bikerê, weş û war xo biresnê waranê xo. Seba ke ma qesasê embazanê xo yê şehîdan bigêrê ganî bi rêxistinkerde û xurtêrî têbigêrê. Wa embazê ma verê şehadetan bigêrê û bipawê.''