Hemserekê Partîya Herêman a Demokratîke (DBP) Mehmet Aslanî ANF’yî rê qisey kerd. Arslanî bale ante serê grevanê vêşanîye yê ke bi serkêşîya Leyla Guvene hemverê tecrîdkerdişê Rayberê Şarê Kurdî Abdullah Ocalanî de yenê viraştene û ard vîrî ke çalakîyan xeylî cayanê dinya de veng dayo.

Arslanî ard ziwan, metodê çareserkerdişê problemî ganî no nêbîyêne, labelê rîyê nizdbîyayîşanê zordar, tasfîyekerdox û polîtîkayanê teslîmgirewtişî yê hukmatê AKP’yî ra seba sîyasetê demokratîkî rayîr nêame verdayene. Naye ra zî şaro Kurd keno ke bi nê metodî vengê xo dinya de bido eşnawitene û bale bianco serê kerdişanê teberê merdimîye yê hemverê Ocalanî.

ÇALAKÎYAN HESASÎYETÊ ŞARÊ KURDÎ RAMOT

Mehmet Arslanî vat ke tewirê hukmatê AKP’yî ke çalakwananê grevê vêşanîye û sîyasetmedaranê Kurdan peygoş keno, hewna dewam keno û vat, “Seba ke grevanê vêşanîye bin bifîno fêlbazî û kayan keno. 12’ê Çele de mîyanê Birêz Ocalanî û birayê ê Mehmet Ocalanî de qasê 15 deqeyan pêvînayîş virazîya. Seba ke dimayê nê pêvînayîşî ra grevê vêşanîye nêqedîyayî, înan embaza ma Leyla Guvene serbest veradaye. No tewirê AKP’yî ramojneno ke nizdbîyayîşê xo yê polîtîkaya tecrîdî nêvurnayo. Eksê nê de kena ke xoverdayîşê grevê vêşanîye bişikno. Yanî hukmatê AKP’yî goş û çimê xo hesasîyetanê Kurdan rê girewtê.”

Arslanî ard ziwan ke xoverdayîşê çalakîya grevê vêşanîye serkewte yo û vat, “Çunke bi nê hawayî polîtîkaya leymine ya AKP’yî dinya de teşhîr bîye. Seba ke hesasîyetê Kurdan ê seba Ocalanî bêrê zanayene, agêra çalakîyêka çalakîye û xoverdayîşêkê muhîmî. Na çalakîya hemrayanê ma bîye vengê birêz Ocalanî û polîtîkayê leyminî yê ke hemverê ê de yenê rayraberdene teşhîr kerdî. La polîtîkaya tecrîdî hewna zî dewam kena û çalakîyê grevê vêşanîye roje bi roje vêşî û pîl benê.”  

‘OCALAN TEPIŞTEYÊKO ALELADE NÊYO’

Hemserekê DBP’yî Mehmet Arslanî dewamê qiseykerdişê xo de ard ziwan ke Rayberê Şarê Kurdî Abdullah Ocalan tepişteyêko alelade nêyo û wina qisey kerd: “O rayberêko sîyasî yo ke bi mîlyonan merdiman eşkera kerd ke ê sey îradeyê xo vînenê. Na rastî tena seba ma wina nêya. Îqtîdaro ke Tirkîya rayra beno zî bi nê zana. Serra 2013’î ra heta 2015’î ê birêz Ocalanî û temsîlkaran dir roniştî. Nizdbîyayîşê bi birêz Ocalanî babeta azadî û demokrasîya Tirkîya de nuqteyêka bewlîkerdox a. Naye ra nizdbîyayîşêko alelade yê hemverê Ocalanî do probleman hîna bikero giran. No nizdbîyayîş do krîzê sîyasî, cimatkî û îqtîsadî yê Tirkîya xorînêr bikero. Halê AKP’yî yo ke nika nêeşkena Tirkîya rayra bero nîşanê na rastîye yo.” 

‘KURDAN XO BI OCALANÎ NAS KERD’

Arslanî ard vîrî Kurdan estbîyayîşê xo bi Ocalanî nas kerd û rind zanê ke Kurdîtîya bê Ocalanî yena çi mana.

Arslanî vat şaro Kurd zano ke Ocalan eşkeno bi ser bikewo, naye ra wayîr ci rê vejîno û sîyasetê Kurdan ra wazeno ke hîna vêşî bibê vengê ê û vernîya polîtîkayanê leyminan bigîrê. Arslanî vat ganî tecrîd bibo problemo sereke yê sîyasetê Kurdan.

AKP SEBA WELATÎ BÎYO PROBLEM

Hemserekê DBP’yî Mehmet Arslanî peynîya qiseykerdişê xo de nê vatî: “AKP teberê krîz, kaos, şer û mergî de sozê sewbîna çîyêk nêdano şarî. Naye ra zî pêkewtiş û şer benê sebebê merdişî. AKP bi nê polîtîkayan têgêrena. Tena Kurdî nê, ganî heme şarê Tirkîya rayîr nêdê nê polîtîyanê şerî yê AKP’yî.

Hêrişê hemverê şarê Kurdî beno ke problemê îqtîdarî yê AKP’yî çareser bikerê, labelê problemê Tirkîya çareser nêkenê. Nê welatî de problem asayîşî û ameyoxî çino. Nê welatî de problem AKP’yî esto. AKP bîyo problem. Çunke AKP vernîya çareserkerdişê probleman de manî yo. Bi Kurdan dir şer kerdişî nê problemî çareser nêbenê. Rayîr û metodê çareserkerdişê problemanê Tirkîya binfînayîşê îqtîdarê AKP’yî yo.”