Tepişteyê sîyasîyî Werîşe Muradî, Reyhane Ensari, Sakine Pervane û Gulrokh İraei yê ke Zîndanê Evînî yê Tahranî de yenê tepiştene derheqê hêrişanê Îsraîlî yê vera Îranî de mektubêk nuşt.Mektub de hêrişê Îsraîlî yê vera Îranî ameyî şermezarkerdene û bale ameye atene serê têkoşînê rêxistinkerdeyî ser.

Mektub vizêr (18ê hezîrane) de hesabê platformê medyaya sanale (X) yê Golrokh İraei ra ame parekerdene. Mektubê tepişteyan ra qismêk wina yo:

“Eşkera yo ke hêzê ke bi îşxal, şer û qirkerdişan wazenê qezenc bifînê dest, na herême rê teberê rijnayîşî de çîyêk nêano. Nê hêzan bi qirkerdiş û cînayetan xo payra verda û bi hêrişanê îşxalî û qirkerdişan warê Rojhelatê Mîyanênî açarna warê şerî. Îsraîl sey qereqolêkê Amerîka, badê Şerê Dinya yê Diyînî sey temsîlkarê herême yê hêzanê superan vejîya werte û sere de Fîlîstîn dima ra Iraq, Afganîstan, Sûrîye, Yemen û tewr peynî de zî bi qirkerdişê vera Gazze wehşetê xo mojna pêro dinya. Qet sebebêkê qirkerdişan çîn o la demokrasîyê rojawanî seba ke xo semedê wehşetê xo yê Rojhelatê Mîyanênî heqdar ramojno tim gêreno bahaneyêkî. Amerîka û rejîmo faşist ê Îsraîlî çim biverdo kamyew welatî ci rê têna şer û rijnayîş anê. Ma hêrişê vera Îranî sey sûcanê bînan ke Rojhelatê Mîyênînî de yenê kerdene, şermezar kenê. Azadîya şaranê Îranî bi têkoşînê rêxistinkerdeyî yê şaran û seferberîya hêzanê komelkî mumkun a.”