Endama Konseya Serekîya Pêroyî ya KCKyî Sozdare Avesta cewab da persanê ANFyî û sere de hêrişê îşxalî yê 17ê nîsane, rojdem ercna.

Qiseykerdişê Avesta ra beşêk wina yo:

''Îmrali de konseptê şerî yo newe dîya destpêkerdene û bi cezayanê dîsîplînî no konsept yeno caardene.Cinîyî, ciwanî, şarê ma û dostê ma 4ê nîsane de bi xurtî wayîrê Rayberîye vejîyayî. 8ê Adare, Newroze û 4ê Nîsane seba wayîrvejîyayîşê Rayberîye bîyî prosesê xurtî. Ganî seba azadîya Rayberîye çalakîyî nêqedê, bi ruhê 8ê Adare, Newroze û 4ê Nîsane Hemleya Wextê Azadîye heta azadîya Rayberîye çalakîyî wa dewam bikerê.

Dewleta tirke 17ê nîsane de hêrişê Herêmanê Pawitişî yê Medya kerd. Hêrişê vera Zapî de armanc îşxalkerdiş o. Dewleta tirke heta nika zaf reyî vera gerîlayan bin kewte la reyna zî wazena ke bi paştdayîşê NATO, PDK û hêzanê mîyanneteweyîyan herême îşxal bikera, gerîlayan tasfîye bikera. AKP-MHP wazenê nê hêrişan de ser bikewê û bi nê hawayî weçînayîşan zî bivisnê destî. Ma hê kewenê serra 100. ya Peymana Lozanî. Îqtîdar wazeno ney ra verî pêro kurdan qir bikera.

Heta nika gerîlayan Zap de xoverdayîşêko pîl mojna. Erdoganî vizêr vat 'Operasyon yewna biney dewam bikero.' Bi nê hawayî ey binkewtişê xo îtîraf kerd. Gerîlayê azadîye yê şarê kurdî bi ruhê Apoyî, bi taktîkanê gerîlatîya dewrê neweyî nêverdenê ke wa dişmen nefes bigêro. Xoverdayîşê Zapî qetî do ser bikewo.

PDK raşta raşte tewrê operasyonê Zapî bîyo û dewleta tirke reyde plansazîya nê hêrişan kerdo. Şarê ma yê Başûrî wa bizano destkewteyê înan hetê keyeyê Barzanîyan ra pêşkêşê dewleta tirke yenê kerdene. PDK bi vatişê 'PKK çira Zap de yo, çira Avaşîn de yo' hêrişanê îşxalî meşrû keno. Xora şarê ma rîyo raştikên ê PDKyî wextê hêrişanê DAÎŞî de dîbî. No operasyon do Erdogan û Bahçelî reyde peynîya Barzanîyan zî bîyaro. Ganî şar, partî, roşnvîr, hunermend, kesayetê xoserî, eşîrî û roşnvîrê Başûrî vera PDKyî tewirê xo bimojnê.

Ganî cinîyî, ciwanî û pêro şarê ma 4 parçeyanê Kurdîstanî û teberê welatî de vejîyê meydanan, vera konseptê şerî yê dewleta tirke cewab bidê û tewrê gerîlayan bibê. Ciwanî wa Hemleyanê 'Wextê Azadîye, Werin Cenga Azadîyê' reyde bi aktîfî tewrê têkoşînî bibê. Cinî û ciwanê Kurdîstanî, wina qebul bikerê ke her ca Herêmê Pawitişî yê Medya yê, Zap o û wina her ca de têbigêrê

Hêzê YBŞ û YJŞyî hêzê xopawitişî yê êzidîyan û Şingalî yê. Dewleta tirke û PDK wazenê YBŞ-YJŞyî tasfîye bikerê. Nika zî mabênê Şingal û Rojawanî de dês virazîyeno. Nê kerdişî pêro bêtewirîya hukmatê Iraqî ra qewimîyenê. 18ê nîsane de tay hêzanê artêşa Iraqî hêrişê YBŞ-YJŞyî kerd. Mesele se bena wa biba ganî pê dîyalogan bêra çareserkerdene. Qet yew hêz nêeşkeno îradeyê komelê êzidîyan bivisno destî. Dewleta tirke û PDK kenê ke çimê şarî bitersnê. Ez venga pêro ciwananê êzidîyan dana ke wa wayîrê statuyê Şingalî vejîyê, vera hêrişan Şingalî bipawê û seba Şingalî têkoşîn bikerê.''