Endama Konseya Serekîya Pêroyî ya KCKyî Sozdar Avesta tewra bernameyê Stêrk TVyî bîye û Hemleyê Şorişgêrî yê Bazanê Zagrosî û Wextê Azadîye û xoverdayîşê gerîlayan ercnayî. Sozdar Avesta verî sere de Sînan Dêrsim şehîdê menga gulane yad kerdî.

Qiseykerdişê Avesta ra beşêk wina yo:

''Tecîrê Îmraliyî şexsê Rayberîye de vera pêro kurdan yeno kerdene. Newroze, 8ê Adare û xoverdayîşê Garê tecrîd kerd pûç. Tewr peyên pêvînayîşê telefonî dîya Rayberîye la wextê ppêvînayîşî de telefon birîya. Rayber Apoyî nê pêvînayîşî de vat o wazeno avûkatanê xo bivîno. Tecrîd pê nê pêvînayîşî nêqedîyeno. Rayber apo çarenusê Kurdîstan û yê şarê herême yo. Heta ke sîyasetê qirkerdişî nêqedo tecrîd zî dewam keno.

Dewleta tirke 2015î ra nata hêrişê Kurdîstanî kena. hêrişê vera Zap, Metîna û Avaşînî newe nîyê. Hetêkî ra ê wazenê Başûrê Kurdîstanî zî îşxal bikerê. Ma vera polîtîkaya înan a neo-osmanî bîyî asteng. Nê hêrişî vera destkewteyanê kurdan ê 40 serran ê. Dewleta tirke seba qirkerdişê kurdanê azadanê ke PKK û Rayber Apoyî awan kerdî herême îşxal kena û wazena xeyalanê Osmanîyan bîyara ca.

Zap, Metîna, Avaşîn, Licê, Amed û Vakurê Kurdîstanî de operasyonê îşxalî dewam kenê. La ma zanenê ke ê do nêresê armancanê xo. Netîceyê nê operasyonî seba înan do netîceya Garê ra xirabêr bibê. Ê do derbanê giranan biwerê. Senî ke ê Zapî ra 2008 de remayî reyna do biremê.

Ez sere de çêranê Zagrosî hêzanê şerî yê Xabûrî û Heftanînî û pêro hêzanê Apogîran selam kena. Înan mojna dinya ke îradeyê gerîlayan xurt o. Gerîlayê ma vera artêşa tirke ya NATOyî bi hawayêkê destanwarî têkoşîn kenê. Goreyê bîlanço 140 leşkerê tirkî heta nika ameyî kiştene û hîrê qatê ci zî birîndar bîyî.

Şarê ma verî nê operasyonî fam nêkerdî, di rojan ra dima vejîyayî meydanan û protesto kerd. No bes nîyo. Ganî şarê ma bizano ke no şer şerê mendiş û nêmendiş o.

Binkewtişê Erdogan û Bahçelîyî yê Zap, Metîna û Avaşînî do tecrîd biqedîno. Eke ê bin nêkewê do hêrişê Rojawanî û Şingalî zî bikerê. Coka ganî şarê ma dormeyê gerîlayan de kom bibo. Paştdayîşê şarê ma ercîyaye yo la qîm nêkeno.

Ganî her kes wurzo payan ser. Bi taybetî wa şarê ma yê Başûrê Kurdîstanî bi hawayêkê xurtî nêrazîbîyayîşê xo bimojno. Ma zanenê ke hêzê sîyasî yê Başûrî bi taybetî PDK dûştê nê hêrişan nîyê. Her roje erdê Kurdîstanî dîyeno bombayan ver la Mesrûr Barzanî vano sebebê nê hêrişan PKK yo. Pawitişê AKPyî karê Mesrûr Barzanîyî nîyo.

Gama bîne ya dewleta tirke do Başûrê Kurdîstanî biba. Wa şarê ma yê welatî û teberê welatî wayîrê têkoşînê gerîlayan vejîyo. Gerîlayî xo ra çarçewa Hemleya Şorişgêre ya Bazanê Zagrosî de mesuldarîya xo anê ca.

9ê teşrîna verêne ra nata vera peymana serê Şingalî ya Hewlêr-Bexdadî Şingal de xoverdayîşêko pîl esto. Ma zanenê ke PDKyî pê zorê Tirkîya na peymane îmza kerde. Na peymane vera êzidîyan sey hacetê şantajî şuxilîyena. Şarê êzidîyan wazeno hetê hêzanê xo ra bêro pawitene. Hêzanê PDK û Iraqî ê verdayî remayî coka înan nêwazenê. Axir şingalijî do na peymane qebul nêkerê.

PDK nika seba weçînayîşan wazeno şarê Şingalî bişuxilno. Ez venga êzidîyanê ke kampanê Başûrî de manenê dana ke pê kayanê PDKyî mexapîyê û raya xo bidê PADÊ.

Ê kesanê ke Dewaya Kobanê de yenê muhakemekerdene vera DAÎŞî kurdî pawitî. Pê na dewa îqtîdarê Tirkîya qesasê binkewtişê DAÎŞî gêno. Ganî şarê ma wayîrê nê sîyasetmedaran vejîyo.

Herêmanê Pawitişî yê Medya de xoverdayîşê gerîlayan dewam keno. Ez venga pêro şarê ma dana ke wa wayîrê erjanê xo vejîyo, seba gerîlayan wezîfeyê xo bîyaro ca. Seba ke wayîrê xoverdayîşê  gerîlayan nêro vejîyayene û 1ê Gulane nêro fîrazkerdene qedexeyê tebervejîyayîş ame îlankerdene. Ma sey PKKyî 1ê Gulane yê pêro karker û kedkaran fîraz kenê.''