Endama Konseya Hemserekîya Pêroyî ya KCKyî Sozdare Avesta bernameyêkê taybetî yê Stêrk TVyî de rojdem ercna.

Ercnayîşanê Sozdare Avesta ra tayê qismê girîngî wina yê:

''Ez xoverdayîşê Îmraliyî yê Rayber Apoyî selam kena. Hemleya 'Rayber Apoyî rê Azadîye, Meseleya Kurdan rê Çareserîye' 2024 de zî bêmabên çar parçeyan de dewam kerd. Şarê ma, tepişteyan, gerîlayan, şarê ma yê teberê welatî û têgêrayîşê ma çarçewa hemle de çalakîyê girîngî kerdî. Bi taybetî çalakîya TUSAŞî hemle viste asta tewr pîle. Bi nê hawayî zemînê pêvînayîşê Rayber Apoyî yê bi Omer Ocalanî ame amadekerdene. Rayber Apoyî nê pêvînayîşî de vat ke tecrîd dewam keno. Nika dewleta tirke wina têgêrena ke seke Rayber Apoyî de pêvînayîş yeno kerdene yan zî do bêro kerdene. 

Hinî prosesê verê ma de azadîya Rayber Apoyî ganî bêra caardene. Muxatabê çareserîya meseleya kurdan Rayber Apo yo. Seba ke dewlete hêzê Rayber Apoyî ra tersena tecrîd vera giran kena. Ciwanî, şarê ma, cinîyî û dostê ma ganî serkêşîya hemle bikerê. 2025 ganî biba serra caardişê azadîya Rayber Apoyî.

Şaranê Sûrîye û Rojawanî rejîmê Esadî rijna. Ez nê şaran fîraz kena. HTŞyî verê xo da Sûrîye, dewleta tirke zî cerganê xo yê DAÎŞ û SMOyî reyde verê xo da Rojawanî. Dewleta tirke 27ê teşrîna peyêne ra nata seba îşxalê Rojawanî hêriş kena. Şarê ma ancî bi koçber. Dewleta tirke hem paştî dana HTŞyî hem zî paştî dana cerganê bînan û wazena ke hukmatê Sûrîye yê neweyî dîzayn bikera. Şarê ma Rojawan de Îdareyo Xoser na ro. Dewleta tirke nê modelî ra tersena û wazena ke ney çin bikera.

 Nika hêrişê vera Til Rifet, Şehba, Minbic, Pirdê Qereqozaxî û Awbendê Tişrînî est ê la hedefê dewleta tirke pêro Rojawanî yo. Eke Sûrîye de rejîmêko demokratîk bêro awankerdene pêro meseleyî do biqedê. La eke Tirkîya mudaxeleyê sûrîye bikera krîzî do xorinêr bibê.

Şorişê Rojawanî şorişê cinîyan o. Coka dewleta tirke hertim cinîyan kena hedef. SMOyo ke cerganê DAÎŞî ra yeno pê zî cinîyan kenıo hedef. Hetê bînî ra Rojawan de rêxistinîya cinîyan xurt a. YPJ est o, dezgehê cinîyan est ê. Rojawan de vera cinîyan tehlukeyê pîlî est ê. Ganî cinîyî vera nînan xoverdayîş û têkoşînê xo, aver berê. 

Hetê bînî ra Rojawan de yewîya cinîyan lazim a. Îdareyê Xoserî zî Fermandarê Pêroyî yê QSDyî zî seba ney veng da. Eke kurdî wazenê Sûrîye de bibê wayîrê îradeyî ganî yew bibê û destkewteyanê xo bipawê.

Dewleta tirke wina îdîa kerd ke 2024 de gerîlayan tasfîye bikera, kilîd bikera. La eqsê ney qewimîya. Gerîlayan Herêmanê PAwitişî yê Medya û Vakur de têkoşînêko bêeman kerd. Newroza 2024î de mujdeyê wesayîtanê pawitişê hewayî dîyabi şarê ma. Ancî çalakîya TUSAŞî ameye kerdene. Ma pê bawer ê ke 2025 de zî gerîlayî seba caardişê azadîya Rayber Apoyî, pawitişê erjanê şorişî û çareserîya meseleya kurdan erkanê xo bîyarê ca.

Sere de Rojawanê Kurdîstanî de pêroyê Kurdîstanî de serra 2025î de partî, dezgeh û şarê ma ganî menfaetanê xo ney menfaetanê neteweyîyan û azadîye esas bikerê. Ganî nê firsendî bi hawayêkê rindî bişuxilîyê. Verê ma de tehlukeyê pîlî est ê. La tehlukeyî çend pîl bibê zî îrade û raştîya şarê kurdî nînan ra pîlêr ê.

Bi na wesîle ez venga cinîyan, ciwanan, şarê ma, dostanê ma, dezgehanê ma, partî û rêxistinanê ma dana ke nîqaşan bidê kişte, bi raştî tewrê nê prosesî bibê û rolanê xo bîyarê ca. Nika ra ez serra 2025î şarê ma, dostanê ma, Xirîstîyanan û pêro şaran rê fîraz kena.''