Tepişteyî zîndananê Tirkîya û Vakurê Kurdîstanî vera tecrîdkerdişê Rayberê Şarê Kurdî Abdullah Ocalanî û binpaykerdişanê heqanê xo 108 rojî yo grevê vêşanîye kenê.

Endamê Komeleya Huqûqnasan ê Azadan (OHD) Avûkat Burhan Artayî derheqê tecrîdê Îmraliyî, polîtîkayanê hukmatî û grevê vêşanîye de ANFyî rê qisey kerd.

Artayî pare kerd ke tengkerdişê warê demokratîkî zêdêr tesîrê zîndanan keno û vat: ''Waro demokratîk yeno astengkerdene, no zî tesîrê sîyaset, komel û huqûqî keno. Warê huqûqî de kerdişê antîdemokratîkî vejîyenê werte. Kurdîstan de huqûq bi temamî werte ra wedarîyayo. Qanûnî ganî seba her kesî seyci bêrê caardene. 2019 de zîndanan de xeylêk binpaykerdişê heqan qewimîyayî. Ganî dewlete verê tepişteyan de goreyê qanûnan têbigêra. Ganî Birêz Abdullah Ocalan zî bieşko çarçewa qanûnan de heqanê xo bişuxilno û pêvînayîşan bikero.''

Artayî vist vîrî ke 2019î ra nata grevê vêşanîye û rojeyê mergî estê û wina dewam kerd: ''Nê meseleyî eşkenê çareser bibê. Eke qanûnê nikayênî bêrê caardene tecrîd wedarîyeno. Birêz Abdullah Ocalan û tepişteyê bînî wayîrê ê heqî yê ke keye û avûkatanê xo bivînê. La na rewşe bîya kerdişê keyfî yê hukmatî. CPTyî zî na rewşa tecrîdî îsbat kerde.''

Artayî da zanayene ke wexto ke Abdullah Ocalan qisey keno komel beno aram û vat: ''Ganî na alozî û têmîyanîye biqedê. Ma seserra 21. de yê, ma eşkenê çarçewa huqûq û demokrasî de ameyoxê xo awan bikerê. Rayîrê çareserîye caardişê qanûnan o. Ganî heq û azadîya kesan bi hawayêkê cidîyî sey esas bêrê girewtene.''