Riha de karkerê Ozak Tekstîlî seba heqanê xo 12 rojî yo xo ver danê. 6ê kanûne de leşkeranê tirkan hêrişê çalakîya karkeran kerdbî û bi îşkenceyî xeylêk karkerî destbend kerdbî.

Endamê Komeleya Huqûqnasanê seba Azadîye (OHD) Ahmet Atişo ke avûkatê karkeranê Ozak Tekstîlî keno, dima ke şi qereqol ke karkeranê destbendkerdeyan bivîno.

Qereqolê Cendirmeyan ê Herêma Sanayî ya Organîze de avûkat Atişî muwekîlanê xo de bi kurdkî qisey kerd. Naye ser o hêzanê asayîşî odaya 'karanê îdareyîyan' de Atiş û muwekîlanê ci rê vat: ''Ma bi kurdkî fam nêkenê, bi tirkî qisey bikerê.'' Fermandar û leşkeranê qereqolî heqaretê Atiş û karkeran kerd û hêrişê Atişî kerd.

Atişî dima Nêweşxaneyê Dewlete yê Balikligolî de raporê derbe girewt. Atişî Serdozgerîya Komare ya Riha de gerreyê leşkeran û fermandarî kerd. Muracat de ame waştene ke kamerayê qereqolî bêrê kontrolkerdene û wa sûcdarî bêrê cezakerdene.