Awa kanalîzasyonê Leşkergehê Komandoyan o ke 15 kîlometreyan Colemêrgî ra dûrî yo, awa herême herimnena. Awa kanalîzasyonî ya ke dekewena awa şimitiş û axpînan, bena sebebê nêweşîyan. Awe seba domananê ke dekewenê çeman tehluke ya. Xeylêk kesan seba gerreyê kanalîzasyonî muracatê merkezanê weşîye kerd.

Rixmê hende muracatan zî hemwelatîyan hema zî netîceyêke nêviste destî. Hemwelatîyî vera mesele nêrazîbîyayîşê xo mojnenê.

Roniştoxanê Colemêrgî ra yew/e vat: ''Awan kanalîzayonî bi mengan o ke dewanê ma ra derbaz bena. Hem xozaya ma bena gemarin hem zî awe herikîyena Çemê Otluca. Bi seyan merdimî nê çemî ra awe şimenê, domanî dekewenê ci, tira awe danê axpînanê xo. Çemê Otluca reseno Colemêrg zî. Dima zî herikîyeno Çemê Zapî.''

Roniştoxêkê bînî zî nêrazîbîyayîşê xo wina ard ziwan: ''Ma dewlete rê zaf muracat kerd la ê bêveng mendî. Awa kanalîzasyonî bena sebebê nêweşîyan. Boya pîse ya kanalîzasyonî her ca ra vila bena.''