DBP, Partîya Çep a Keske, TJA û MED TUHAD-FEDî Buroyê Paştdayîşî yê Merkezê Pêroyî yê DBP yî yê Amedî de derheqê hêrişê îşxalî yê dewleta tirke yê vera Rojawanî de eşkerayîye daye. Îdarekarê Partîya Azadîye û Merdiman (PÎA) û  Partîya Komunîste ya Kurdîstanî (KKP) zî tewrê eşkerayîye bîyî.

Salîha Aydenîz vîst vîrî ke 5ê teşrîna verêne ra hêrişî dewam kenê ke nêweşxane, santrale awe û ceyranî yenê hedefgirewtene û vat: "Ferqê nê hêrişan û hêrişanê DAÎŞî çîn o. Nê hêrişî sûcê merdimîye yê. Heme dinya û dezehê heqanê merdiman vera nê hêrişan bêveng ê. Yeno waştene ke coğrafyaya Rojhelatê Mîyanênî newera bêro dîzaynkerdene. Bi nê dîzaynî yeno waştene ke şarî bêrê eciqnayene. Rojanê ravîyarteyan de Wezîrê Karanê Teberî Hakan Fidanî vat ê do sîstemê Rojawanî serûbin bikerê û hêrişê waranê cuye bîkerî. Netanyahuyî zî semedê Gazze eynî eşkerayîye daye. Heme dinya vera vatişanê Netanyahuyî rêzabîyayîş mojna la vera vatişanê Hakan Fidanî çewî vengê xo nêvet. Wird eşkerayîyan de zî zîhnîyet seycîye yo. Ganî semedê Rojawanî veng bêro vetene. Înanê ke Hakan Fidanî rê çapik kuwayî, cesaret da Netanyahuyî." 

Aydenîze bale ante eşkerayîya Serekkomarê Tirkîya Tayyip Erdoganî ser û wina vat: "Erdogan vano nêwşxane, mecîs, nêweşxane û mektebî dîyayî bombayan ver, dinya bêveng menda. Vano ‘Heqê merdiman ho ça? ’ Ma zî vanê ke; Şima Mexmûr de camî, Dêrik de nêweşxane da bombayan ver. 5 cinîyê ke hega de xebityayênê şima birîndar kerdî. Eyn Îsa de şima di domanê 10 û 9 serreyî qetil kerdî. Ho ça huqûq, ho ça heqê merdiman? Tîya eşekera dişmenîya kurdan yena kerdene. Serekê Meclîsî Numan Kurtuluş vano heta ke haştîya Rojhelatê Mîyanênî mebo, haştîya dinya nêbeno. Mifteyê haştîye yê Rojhelatê Mîyanênî destê Birêz Ocalanî de yo ke bi serran o binê tecrîd de yo. Rojawan de sîstemo ke Rayber Apoyî veto werte, yeno esasgirewtene. Bi nê hêrişan yeno waştene ke no sîstem werte ra bêro wedaritene. Dewleta tirke û îtîfaqê AKP-MHPyî wazeno azadîya kurdan tesfîye bikero." 

Salîha Aydenî ard ziwan ke ganî her kes vera hêrişan vengê xo berz bikero û nê vatî: "Eke demokratîkbîyayîşê Rojhelatê Mîyanênî yeno waştene ganî meseleya Fîlîstîn û Îsralîlî û meseleya kurdan bêrê çareserkerdene. Ma veng danê Neteweyanê Yewbîyayeyan ke wa rolê xo bîyaro ca. Têna bi nuştişê raporan nêbeno. Hinî berpirsîyarîya xo bîyarê ca. Efrin, Serêkaniye, Girê Sipî vera cuye hêrişî yenê kerdene. Ganî şima rol û mîsyonê xo bîyarê ca. Ma semedê warê hewayî zî veng danê; Ganî warê hewayî yê Rûsya, Amerika û Fransa bêrê qefilnayene. Rojawan bine ambargoyê giranî de yo. Ganî no ambargo bêro wedaritene.” 

Aydenîzî bale ante şînê hîrê rojan ê Rojawanî ser û vat: "Ma sey şarê Tirkîya û Vakurî nê şînî sey şînê neteweyî vînenê. No şînê ma pêrun o. Ma do sey şarê Vakurî bêveng memanê. Ma bi îredeyê xurtî wayîrê Kobanê vejîyayî, ma do bi nê ruhî wayîrê Rojawanî zî bivejîyê.”