Aydenîze: Hêriş seba îşxalê Başûrê Kurdîstanî yo

Hemserekê DBPyî Aydenîze vat ganî PDK, YNK, PKK û partîyê sîyasîyî pêro bivînê ke hêrişê vera Başûrê Kurdîstanî seba îşxalkerdişî yê û no pers pêroyînan ra persa: ''Efrîn de çira alaya tirkan esta, çira PTT yeno akerdene?''

Hemsereka Partîya Herêman a Demokratîke (DBP) Salîha Aydenîz derheqê hêrişanê dewleta tirke yê vera Başûrê Kurdîstanî de ANFyî reyde qisey kerd.

Aydenîze vist vîrî ke kolonyalîzmê tirkan bi seyan serrî yo ke pê konseptê qirkerdişî bi hawayêkê bêmabênî hêriş keno û seba nê hêrişan paştdayîşê hêzan ê mîyanneteweyîyan û herêmîyan gêno. Aydenîze vat: ''14-15ê hezîrane de waranê sivîlan ser o bombayî ameyî varnayene, Başûrê Kurdîstanî binê îşxalî de yo.Nê hêrişê vera sivîlan ra DYA, Iraq, Îran û Tirkîya mesuldar ê. 

Vera hêrişanê topyekûnan pawitişê destkewteyanê çar parçeyanê Kurdîstanî pê awankerdişê yewîya neteweyîye beno.Xîret kenê ke partîyê kurdan, rayberê kurdan yewbînan reyde şer bikerê. Ma sey partîyan zî sûcdar ê. Têkoşînê kurdan yew o. Ganî merdimî bi hawayêkê yewpareyî biewnê Rojawan, Vakur, Rojawan û Başûr. Têkoşînê her partîye têkoşînê azadîye yê şarê kurdî yo. 

Ganî her partî sey temînatê yewbînan bêra dîyene. Nika Efrîn de kurdkî qedexe ya û alaya tirke yena daliqnayene. Başûrê  Kurdîstanî  pê bedelanê pîlan ronîya naye ra hêrişê vera Başûrî gefê pîlî yê. Pawitişê nê destkewteyan pê sûcdarkerdişê partîyêka kurdan a bîne nêbeno, pê caardişê yewîya neteweyîye beno.

Mîyanê şarê ma de meseleya yewîya neteweyîye çin a la mîyanê partîyanê sîyasîyan ê kurdan de meseleyê tewirê yewîye esta. Vakur de pê qeyûman, Başûr û Rojawan de zî pê hêrişan îradeyê şarê ma nêno naskerdene. Ganî ma vera nînan bi hawayêkê topyekûnî wurzê payan ser.

PDK, YNK û PKK nêeşkenê waştişanê şarî pey goş bikerê, ganî bi taybetî PDK tewirê xo ser o vindero. Beno ke nêzdîbîyayîşê ma yo sîyasî cîya yo labelê ganî armancê ma azadîya şarê ma bibo. Tirkîya çinkerdişê PKKyî nê çinkerdişê kurdan armanc kena. Serewedaritişê Şêladizê girîng û meşrû yo. 

Ganî PDK, YNK û PKK bivînê ke hêrişê vera Başûrê Kurdîstanî seba îşxalkerdişî yê. Hêriş têna vera PKKyî nê seba îşxalê Başûrê Kurdîstanî yê. Çira Efrîn de alaya tirkan esta, çira uja de PTT yeno akerdene? Ganî partîyê kurdan naye xo ra bipersê.