Hemsereka Partîya Herêman ê Demokratîkan (DBP) Salîha Aydenîz û Wekîlanê Partîya Demokratîke ya Şaran (HDP) Muazzeze Orhan, Saît Dede û endamanê partîye qezaya Geverî ya Colemêrgî de gorê ke ameyî rijnayene zîyaret kerdî.

ewleta tirke 13ê adara 2016î de taxa Ormanî de qedexeyê vejîyayîşê teberî îlan kerdbi û taxe de tay kesî qetil kerdbi. Heyetî taxe de goristano ke 7 reyî hêrişê ci ame kerdene, zî zîyaret kerd.

Hemsereka DBPyî Salîha Aydenîz serê goran de ke ameyî texrîbkerdene eşkerayîye daye û vat: ''Na barbarî ya. No hêriş yeno manaya qedîyayîşê îtîfaqê AKP-MHPyî yo. Tersî ver a hêrişê goran kenê. Ne exlaq, ne huqûq ne zî merdimîye mende. Na hîşmendîya DAÎŞî ya ke DAÎŞî pê hêrişanê goran dest pê hêrişê merdimîye kerd. Nê hêrişê ke vera erjanê kurdan ê, rewşêka winasêne ya ke exlaqê dişmenîye zî derbaz kerd. Nê hêrişî do nêeşkê rijîyayîşê înan vindarnê.''

Aydenîze venga raya umûmîye da û vat: ''Ganî kurdî vera nê hêrişan têna nêrê veradayene.''

Suleyman Aksuyo ke Qirkerdişê Pirsûsî de amebi qetilkerdene, gorê ey zî amebi rijnayene. Zîyaret de dayîka Suleyman Aksuyî Kudrete Aksu zî amade bîye. Dayîke Kudrete serê gorê lajê xo de vat: ''Lajê mi mamosta bi. DAÎŞî lajê mi kişt. Çira hêrişê gorê lajê mi kenê? Lajê mi ra çi wazenê?''

Heyetî dima keyeyê ke gorê înan ameybî texrîbkerdene zîyaret kerdî.