Dormeyê Dêrsimî pê kuleyanê leşkerîyan, noqtayanê cigêrayîşî, baregehan û qereqolan girewte yo. Dewleta tirke binê nameyê 'herêma asayîşê taybetî' nêverdena merdimî şorê waranê daristanan û nê cayan qedexe kena.  Şaristan de hertim çalakî û aktîvîteyî yenê qedexekerdene û her ca de seba teqîbkerdişî kamerayî est ê.

Şaristan de ciwanî çarçewa polîtîkayanê şerê taybetî de yenê musnayene bi madeyanê tîryakî, şar pê polîtîkayanê asayîşî dîyeno koçkerdene û ciwanê bînî zî krîzê ekonomîkî ra şinê teberê welatî. Wekîla Partîya Çep a Keske ya Dêrsimî Aytene Kordu Ajansê Mezopotamya rê rewşa şaristanî ercnaye.

Aytene Kordu bale ante ser ke wextê Festîvala Kultur û Xoza ya Dêrsimî de zî binê nameyê 'asayîş û aramîye de' qedexeyî ameyî kerdene û vat: ''Ma şaristan de çalakîyêka qije zî bikerê bi seyan polîsî dormeyê ma de yenê pêser. La heman şaristanî de şuxilnayîşê tîryakî vila beno. No şero taybet o. Ciwanî yenê yozkerdene. Eke dewlete wazena şaristan de aramîye û asayîşî bîyara ca ganî hêverî Gulîstane Doku bivîna.''

Aytene  Kordu vist vîrî ke Dêrsimî zaf reyî surgun, qirkerdiş, teda û hêrişî dîyê û vat: ''Şarê Dêrsimî, kultur, bawerî û ziwanê ci tim raştê teda yenê ke nê kerdişî pêro polîtîkayê taybetî yê. Ciwanê ma rîyê nê tedayan ra şinê. Şar ma pê zorî dîyeno koçkerdene. La ganî ma wayîrê ziwan, erd, bawerî, kultur û awa xo vejîyê û tîya meteriknê.  Sakîna Cansiz û Aysele Dogan tarîxê xoverdayîşî yê Dêrsimî ra yê. Ma zî hêzê xo nê tarîxê xoverdayîşî ra gênê. Ganî ma pîya vera polîtîkayanê şerê taybetî têkoşîn bikerê.''

Wekîle Aytene Kordu eşkera kerd ke îfadeyê 'Dêrsim şaristanêko turîstîk o' parçeyêkê polîtîkayanê asîmîlasyonî yo û vat: ''Zîyaretgehê ma binê nameyê turîzmî de yenê çinkerdene. Ma nê nêzdîbîyayîşî qebul nêkenê. Cayê ma yê fîrazî cayê turîstîkî nîyê, ê cayê îbadetî yê.  Ma şarê xo, rêxistinanê komelê sivîlî û komeleyanê elewîyan reyde kenê ke verê nê kerdişan bigêrê. Qedexeyî zî parçeyê asîmîlasyonî yê. Kultur û bawerîya ma nêşinasîyenê, cografyaya ma rê 'şaristanê turîzmî' vajîyeno. La bi nê kerdişan raştîyî nênê nimnayene. Ma do vera nê polîtîkayanê asîmîlasyonî têkoşînê xo rê dewam bikerê.''