Hêrişê îqtîdarê AKP-MPyî yê vera kurdan prosesê vîrusê Korona de zî dewam keno. Tewr peyên zî îqtîdar dest na şaredarîyanê Îdir, Sêrt, Kurtalan, Baykan û Altinova ser. Nika destê HDPyî de têna 12 şaredarîyî estê. 

Hetkarê Hemserekanê HDPyî Tuncer Bakirhanî xespê dewleta tirke ANFyî rê ercnayî.

Bakirhanî bale ante ser ke îqtîdarî wextê pandemîye de hêrişê xo zêdînayî û vat: ''Nê kerdişê AKPyî îradeyê şarê kurdî nas nêkenê. Îqtîdar seba ke kurdan bidejno her çi keno. Partîya ma û fikrê ma ey teng keno. Çunke ma pê sîstemê xo îdareyo têdûşt awan kerd. Serra 2016î de zî xebatanê ma ra semed dest nabi şaredarîyanê ma ser. Seba ke ma ra tersenê pê metodê xespkerdişî têgêrenê. Şarê ma do nê kerdişan qebul nêkero û nêrazîbîyayîşê xo yê demokratîkî bimojno. Ma zî heta ke hîşmendîya ke statukoker, tekperest nîya awan bikerê vera înan do têkoşîn bikerê. Partîya ke rixmo ke hemserekê ci zîndan de yê îqtîdar tersnena. No mojneno ke rayîrê ma raşt o.''

Tuncer Bakirhanî da zanayene ke tesadufî nîyo ke nê xespkerdişî 15ê Gulane Roşanê Ziwanê Kurdkî de ameyî kerdene û vat: ''Ma heta ewro zaf îqtîdarî dîyî. La ma heta ewro îqtîdareko winasên o ke polîtîkayanê gemarinan keno, nêdî. Xora îqtîdarê verênî zî nînan ra cîya nêbî. La no îqtîdar kurdan dejneno û roşanê kurdan ci rê zehîr keno. Ma heta nika îqtîdarêko wina xirab nêdi.  Aslê xo de nê kenê ke tarîxê ma, sembolanê ma texrîb bikerê. Ma pê tewirê xo do heqê nê kerdişan ra bêrê. Çunke ma raşt ê, ma aîdê nê erdî yê û ma raştîyan pawenê. La êyê ke ewro şaredarîyanê ma xesp kenê rîpelanê lêşinan ê tarîxî de pê pratîkanê xo do bêrê qalkerdene.''