Hemserekê Pêroyî yê DEM Partî Tuncer Bakirhanî kombîyayîşê grûbê meclîsî ya partîya xo de rojdem erjna. Bakirhanî  bi pîrozkerdişê Roja Rojnamegeranê Kurdan dest pê qiseykerdene xo kerd.

Bakirhanî rewşa weşîya Sirri Sureyya Onderî vistvîre û vat rewşa ci hema stabîl a,yanî xover dano, têkoşîn keno. Bakirhanî bale ante paştdayîş û wayîrvejîyayîşê Onderî ser û Erdogan û Mesut Barzanî zî tede heme kesanê ke o zîyaret kerd û mesaj şawitî înan rê spas kerd.

Bakirhanî nê vatî: ''Ma pêro şahîdê ke embazê ma Sirri Sureyya Onder senî semedê haştîye cehd kerd, semedê şaran têkoşîn kerd. Paştdayîş û wayîrvejîyayîşê embazê ma Sirriyî reyna mojna ke komel senî haştîye wazeno. Komel şexsê Sirri Sureyya Onderî de wayîrê keda ke semedê haştîye ameye dayene, vejîya. No çîyêko zaf qiymetin o.

Nê paştdayîşî de raşta zî hêvîyêka zelal û sade bibî. Tede sîyaset çîn bi. Ma nê zaf muhîm vînenê. Çunke ma zana ke haştîye eynî wextî de weşî ya. Haştîye weşbîyayîşê komelêk o. Haştîye şîfaya komelkî ya. Her vinceyê nê welatî de, her dewe, her parçeya herra ci de ganê kesanê ke semedê haştîye bedel dayo est o. Semedê Tirkîya prosesê haştîye û komelê demokratîkî têna tercih nê, mecburîyet o. No proses şanso tewr pîl ê Tirkîya yo. Ez hêvî kena ke ma pêro nê şans û firsetî erjnenê.

Vizêr heyetê ma Birzê Ocalanî dir pêvînayîş kerd. Embazanê ma vat Birêz Ocalan bi moralê berzî xebatanê xo rayra beno. Birêz Ocalanî vato her kes paweno ke hewteyanê verê ma de averşîyîşê ke prosesî aver benê bêrê ciwîyayene. Pêvînayîşo ke ame kerdene do hetê dezgehanê ma ra bêro erjnayene û pêra rayrapêroyîye rê bêro eşkerakerdene. Nê porsesî de di gamê girdî şert ê. Gama verêne zemînêko huqûqî, ya diyîne zî îradeyo sîyasî yo xurt hewce keno.

Coka rojanê verê ma de serekwekîlê grûba ma do Wezîrê Edaletî dir bêrê têhet. Ma Serekê Meclîsî de tede partîyanê sîyasîyan dir pêvînayîş bikerê. Ma tîya ra veng danê îqtîdar û muxalefetî: Tirkîya de wa hinî sîyaset bibo normal. Semedê haştîye gamî bêrê eştene. Gerek tecrîdê serê Birêz Ocalanî cade bêro wedaritene ke o bişeko xebatanê semedê haştîye rayra bêro.

Vengdayîşê Birêz Ocalanî yê têna vengdayîşêk nîyo, no pirdê nê welatî yê ameyoxî yo. Gerek çekî bêrê wedaritene. Têna çekê destan nê çekê zîhnîyetî zî gerek bêrê wedaritene.  Ma sey kurdan, kedkaran, bindestan  nê welatî  sînenê. Ma semedê haştîye hazir ê. Kam ke seyyewbînîye, edalet û demokrasî wazeno wa tewrê prosesê înşa yê nê prosesî bibê.''