Bana de terorê dewlete: Çêrnayîşê heywanan, awdayîşê baxçeyan qedexe yê!
Dewa Bana ya qezaya Basa ya Şirnexî nêzdîyê di mengî yo binê ablûqaya leşkeran de ya. Dewe de çêrnayîşê heywanan û awdayîşê baxçeyan zî qedexe yê.
5 herêmanê qezaya Basa yê Şirnexî de seba 15 rojan qedexeyê dekewtiş û vejîyayîşî ame îlankerdene.
Dewa Bana de temmuze de xeylêk kesî ameybî destbendkerdene û qasê 2 mengî yo dewe binê ablûqaya leşkeran de ya. Dewe de dekewtiş û vejîyayîşî binê kontrolê leşkeran de yê. Leşkeran qedexe kerd ke dewijî nêmroje ra dima şorê baxçeyanê xo.
Goreyê xebera Ajansê Mezopotamya dewijan vera qedexeyan nêrazîbîyayîşê xo mojna. Dewijan da zanayene ke leşkerî tedaya ma kenê û vanê ''Heta ke qedexe biqedo şima do heywananê xo axûrî ra nêvejê.''
Qedexe cuya dewijan rê bi hawayêkê giranî tesîr keno ke çimeyê debare yê dewijan heywankarî ya.
Dewijan dîyar kerd ke leşkeran şanê 14ê êlule de camî ra anons kerd ke qedexe yo ke heywanî bêrê çêrnayene.
