Qezaya Xozatî ya Dêrsimî de bado ke deweka Koçerî ya dewa Kurukaymakî de operasyono leşkerî ame kerdene şewat vejîya. Şewato ke 18ê tebaxe de vejîya dewam keno. Heyetê Rayberdişî yê Baroyê Dêrsimî derheqê şewatî de eşkerayîye daye.

Eşkerayîye de şewatê verênî yê ke Dêrsimî de vejîyayî zî ameyî vîrardene û ame vengdayene ke  wa her kes wayîrê heme ganîyan têr û tûrî vejîyo. Dewamê eşkerayîye de nê maeyî vatene: ''Cografyaya ma de  warê ma yê ke her hetî ra wayîrê mîrasî yê pê şewatan yenê texrîbkerdene û mudaxaleyo ke hewce keno nêno kerdene. Ma tîya ra vengdane ke wa vera şewatan tedbîrî bêrê girewtene û semedê hewnakerdişê şewatî her hetî ra mudaxale bêro kerdene. Ma do prosesê huqûqî teqîp bikerê û gerre bikerê.''