Baroyê Vakurê Kurdîstanî binê meymandarîya Baroyê Çewlîgî de ameyî yewca, kombîyayîşêk kerd û netîcenameyê kombîyayîşê xo pare kerd.

Baroyan da zanayene ke pê bahaneya janî teşrîna verêne ya 2020î ra nata kombîyayîşê pêroyî yê baroyan yenê astengkerdene la partîyê sîyasîyî hê kongreyanê xo kenê. Baroyan waşt ke na astengîye wedarîya. Baroyan waşt ke cade dewaya kişîyayîşê Tahîr Elçîyî bêra eşkerakerdene û sûcdarî bêrê muhakemekerdene.

Baroyan eşkerayîya xo de bale ameye antene grevê vêşanîye yê teppişteyan ser. Baroyan îfade kerd ke seba ke mergî nêqewimîyê ganî waştişê meşrûyî yê tepişteyan bêrê caardene û binpaykerdişê heqanê tepişteyan bêrê wedaritene.

Baroyan pare kerd ke wextê peyênî de sereştiş, destbendkerdiş û tepiştişan de îşkence û kerdişê xirabî zêdîyayî û ganî nê serebûtî bêrê cigêrayene.

Baroyan ard ziwan ke 3 menganê 2021î de 67 cinîyî hetê camêrdan ra kişîyayî û bi desan cinîyî maruzê şîdetî mendî. Baroyan waşt ke wa madeya 6284. û Peymana Îstanbulî cade bêrê caardene.

Nê baroyan morê xo da binê eşkerayîye: Baroyê Semsûr, Baroyê Agirî, Baroyê Bedlîsî, Baroyê Dêrsimî, Baroyê Amedî, Baroyê Colemêrgî,Baroyê Mêrdînî, Baroyê Mûşî, Baroyê Sêrtî, Baroyê Şirnexî, Baroyê Riha, Baroyê Wanî.