Vervatoxa Meclîsê Cinîyan ê HDPyî Ayşe Acar Başaran derheqê qeyûman û hêrişanê vera cinîyan de ANFyî reyde qisey kerd. 

Qiseykerdişê Başarane ra beşêk wina yo: ''Dewleta tirke xo tekperestîye ser o awan kerd. Na rewşe zî tim ci rê krîzî ardî. Ge ge têgêrayîşê şarî vejîyayî werte û vera nînan zî darbe ameyî kerdene. Dewlete bi darbeyan estbîyayîşê xo dewam kerd. Weçînayîşê 7ê hezîrana 2015î de ame dîyene ke HDP sey alternatîfêk vera AKPyî de vindeno. No alternatîf vera statukoyê dewlete zî bi. Coka AKP û dewleta xorin ameyî têhet û rejîmêko newe awan kerd. Dima 15ê temmuza 2016î û 11ê êlula 2016î de prosesê qeyûman dîya destpêkerdene. Polîtîkaya qeyûmî raşta zî vera projeyê HDPyî yê cuya newîye, alternatîf û xeta hîrêyîne ameye caardene.

 Hukmatê AKPyî sey sivîl aseno la têna eşkeno pê zorî payan ser bimano. AKPyî Darbeya 15ê Temmuze sey firsendêk dî û pê metodê darbeya leşkerî dest pê îşxalê şaredarîtan, tayînkerdişê qeyûman kerd. Pê nê qeyûman reyna vera Kurdîstanî seferêko fetîh da destpêkerdene.

Qeyûman ra dima vera warê ziwan, kultur û tarîxê kurdan, vera zemînê têkoşînê cinîyan û sîstemê cinîyan hêrişêko pîl ame kerdene. Heykelê namdaranê kurdan, tabelaya kurdkî ameyî wedaritene. Camêrdî sey îdarekar dezgehanê cinîyan de ameyî wezîfedarkerdene. Nika şaredarîyê qeyûman sey merkezê asîmîlasyon û qereqolî xebitîyenê. 

Eke ewro hêriş, teda, asîmîlasyon kurdan rê yenê ferzkerdene, no nêzdîbîyayîşê îqtîdarî yê vera şaredarîyanê CHPyî zî nîşan dano. Eke şima vajê ma do Kurdîstan de şer bikerê la Tirkîya de demokrasî awan bikerê, no xeyalperestî yo. Polîtîkayê şîdetî benê sebeb ke mekanîzmayê darbe têbigêrê. Ganî ma vera ney bi hawayêkê hemparî têbigêrê.

Cinîyê kurdî asta berze ya dinya de sey raybere yenê qebulkerdene. Coka AKP hêrişê cinîyan keno ke nê hêrişî şexsa cinîyan ê kurdan de vera têkoşînê cinîyan ê enternasyonalî yê Tirkîya yenê kerdene. Tesadufî nîyo ke nê hêrişî prosesê janî de yenê kerdene. Çunke cinîyan nê prosesî de zî têkoşînê xo ra fek vera nêda. No îqtîdar wazeno serranê qijan de domanan bizewijnê û cinîyan bikerê binê emrê camêrdan. Ma do xo ver bidê.

Tirkîya de hînî qanûn nêmendo. Tecawuzkerî, kiştoxê cinîyan pêro hê teber de yê. Nê hêrişê vera cinîyan biplan yenê kerdene. Îqtîdar çi wext biwazo hêrişêkê hîrayî bikero reya verêne hêrişê cinîyan keno. Mumkîn nîyo ke pê nê hêrişan netîce bigêro. Cinîyî do têkoşînê xo de qet apey game nêerze. Têkoşînê ma do dewam bikero.''