Hemleya ke hetê Platformê Abdullah Ocalanî rê Azadîye, Meseleya Kurdan rê Çareserîya Sîyasîye ra 74 merkezanê cîya cîyayan ê dinya de dîyaye destpêkerdene, Başûrê Kurdîstanî de ameye wayîrvejîyayene.

Parka Azadî ya Silêmanî de semedê paştdayîşê hemle eşkerayîye ameye dayene. Xeylêk sîyasetmedar, roşnvîr, aktîvîstê komelê sîvîlî û akademîsyenî tewrê eşkerayîye bîyî. Verê eşkerayîye semedê şehîdan rêz ame girewtene.  

Eşkerayîye hetê endamê Komîteya Çalakîye ya 'Abdullah Ocalanî rê Azadîye, Meseleya Kurdan rê Çareserîya Sîyasîye' nuştox û çimdarê sîyasîyî Adil Osmanî ra ameye wendene.

Adil Osmanî vist vîrî ke Komployê Mîyanneteweyî yê vera Rayberê Şarê Kurdî Abdullah Ocalanî kewto serra 25 û nê vatî: “Şarê ma vera zulmê pîlî ke çirey nêameyo vînayene xover da, bi desan welatperweran bedenê xo da adirî ver û esîrgirewtişê Abdullah Ocalanî red kerd. Rayber Apo, şar û Têgêrayîşê Azadîye zixma pabesteyê yewbînan ê. Îşxalkerî kenê ke Rayber Apoyî  û şarê kurdî cêser bifînê. La îşxalkerî û komplokerî nêeşkeyî ser bikewê. Paradîgmaya Abdullah Ocalanî mifteyê heme problemanê merdimîye yo. Şarê kurdî û komelê herême azadîya Rayberê Şarê Kurdî Abdullah Ocalanî wazenê, çunke azadîya ey de azadîya xo vînenê. Sere de Başûrê Kurdîstanî sebebê hêrişanê îşxalî û krîzanê Rojhelatê Mîyanênî  xayînîye ya. Birêz Abdullah Ocalan vano heta ke xayînîye û îşxal bibê, do şoriş û xoverdayîş zî bibê. Ma vanê ke azadîya Birêz Abdullah Ocalanî garantîya çareserîya haştîye ya şarê kurdî û şaranê Rojhelatê Mîyanênî ya. Çoka semedê  haştîye û çareserî ganî Birêz Abdullah Ocalan bibo azad.”