Bi wesîleya 15ê Gulane Roşanê Ziwanê Kurdkî nuştox Kahir Bateyî bale ante tehlukeyê vera kurdkî ser û vat: ''Kurdkî ser o rewşêka bitehluke esta. Kurdî nê tehlukeyî nêvînenê û vera ci têkoşîn nêkenê. Kurdkî her ke şino hêlîyena. Mîyanê domananê kurdan de kurdkî zaf tay yena xebitnayene.

Gune dewlete ra zêdêr ê polîtîka û dezgehanê kurdan o. Ewro dezgehanê kurdan de kurdkî ziwanêko xerîb o. Seba sîyasetmedaranê kurdan zî kurdkî xerîb o. Eke sîyasetmedarê kurdî zî wayîrê ziwanî nêvejîyê merdim dewlete ra çi bipawo? Dewlete xora înkarî ser o nîyaye ro. La sîyasetmedarê kurdî zî dewlete ra zêdêr asîmîle kenê û wayîrê kurdkî nêvejîyenê. Merdim eşkeno pê vengdayîşan hîşmendîya kurdkî awan bikero. Komelêkê winasênî de zî hîşmendîya ziwanî pê hîşmendîya neteweyîye eşkena xo ver bida. Têna rayîrêkê ney esto.Seba ke kurdkî geş biba û çin nêba ganî dezgeh û şexsîyetê kurdî, pê hîşmendîyêka neteweyîye stratejîyêke bidê verê xo.''