Hemserekê Konseya Rayberdişî ya KCKyî Cemîl Bayikî bi wesîleya Xoverdayîşê Rojeyê Mergî yê Pîlî yê 14ê Temmuze ANFyî rê qisey kerd ke serkêşîya kadroyanê verênan ê PKKyî Mehmet Hayrî Durmuş, Kemal Pîr, Alî Çîçek û Akîf Yilmazî de Zîndanê Dîyarbekîrî de vera wehşetî dîyabi destpêkerdene.

Qiseykerdişê Bayikî ra beşêk wina yo:

''Ez verî şexsê şehîdanê 14ê Temmuze de pêro şehîdanê ma bi rêzdarî û minetî yad kena. Ganî hol bizanîyo û fam bibo ke Xoverdayîşê 14ê Temmuze mîyanê kamyew şertan de, senî û key qewimîya. Nê xoverdayîşî tesîrê partîya ma, rejîmê Tirkîya û stretejîya NATOyî kerd. NATOyî bi rayîrê Tirkîya waştêne ke Rojhelatê Mîyanênî de stratejîya Îslamê sîyasîyî bîyaro ca, dormeyê Sovyetan bigêro. Coka NATOyî Tirkîya de vera darbeyî dayî kerdene. Armancê Darbeya 12ê Êlule tasfîyeya têgêrayîşê kurdan û têgêrayîşê çepgîran bi. Na darbe reyde generalan Tirkîya vurnaya zîndanêkê pîlî, çepgîrî eştî zîndanan. Rejîmê darbe waşt ke zîndanan de bi temamî çepgîran teslîm bigêro, coka hende îşkence ame kerdene.

Têna Zîndanê Dîyarbekîrî vera hukmanê 12ê Êlule xo verda û milê xo çewt nêkerd. Esat Oktay Yildiran Zîndanê Dîyarbekîrî de îşkenceyê taybetî kerdî. Eke ê Zîndanê Dîyarbekîrî de ser bikewtêne hînî xoverdayîş nêmendêne û stratejîya NATOyî do ser bikewtêne. O çax têna Zîndanê Dîyarbekîrî payan ser de mend, dewlete vatêne 'Ya dewlete yan zî PKK do ser bikewo.' Zîndanê Dîyarbekîrî de şero psîkolojîk û taybet est bi û seba îşkence sînor çin bi. Înan vatêne qey 'ê do peynî de war verdê.' Serkêşê xoverdayîşê Zîndanê Dîyarbekerî kadroyê PKKyî bîyî.  

O çax seba ke vera hukmatê faşîstî yê darbe teber de xoverdayîş çin bi, rejîm Zîndanê Dîyarbekîrî de pêro hêzê xo şuxilnayêne. O çax xeylêk têgêrayîşê çepgîr-sosyalîstî şikîyabî, vejîyabî teberê welatî û verê xo dabî Ewropa. Ameyêne waştene ke wa têgêrayîşê ma zî verê xo bido Ewropa û anêgêro. Rayber Apoyî seba ke verê ney û tasfîyeya zereyî bigêro zaf têkoşîn kerd. O çax embazanê sey Hayrî û Mazlûmî zî Zîndanê Dîyarbekîrî de têkoşîn kerdêne. No têkoşîn zî hetkarîya Rayber Apoyî kerd. Têkoşînê Zîndanê Dîyarbekîrî Rayber Apoyî rê bi moral û çimeyê hêzî. O çax gerîlayan verê xo da Botanî, Hemleya 15ê Tebaxe wina qewimîyaye. Çalakîya 14ê Temmuze PKKyî ra ber pêro hişmendîyî wedaritî. Dişmenî waştêne Zîndanê Dîyarbekîrî bikerê gorê PKK û kurdan. Embazanê ma no fam kerd û verê dewleta faşîste de vindertî.

Esat Oktayî vatêne 'Şima do hêzê dewlete bivînê' la embazanê ma hêzê PKK û şarê kurdî mojna. Zîndanê Dîyarbekîrî şerê îradeyî ame kerdene. Embazanê ma vat 'Ma do Zîndanê Dîyarbekîrî bikerê kelaya xoverdayîşî.' Coka înan vat 'Xoverdayîş ciwîyayîş o, teslîmîyet îxanet o.' Çalakîkeranê 14ê Temmuze xo rê mesuldarî, serkewtiş û çareserîye esas kerdî û çalakîya xo kerde. Netîceya çalakîya înan de dewleta tirke bin kewte, seba şaranê Tirkîya sosyalîst, çepgîr û demokratan berî newe ra abîyî. Xoverdayîşê Zîndanê Dîyarbekîrî ra dima şarî pê Rayber Apoyî û PKKyî bawer kerd û wayîrê ci vejîya. Şarî vat 'PKK ma yê.' Çalakîya 14ê Temmuze mîyanê partîye de ruhêk aferna, ma verê xo da azadîye. 

Embaz Hayrî Durmuş rixmê hende xizmetan û têkoşînê xo vatbi 'gorê mi ser de deyndarê şarê xo binusê.' O qet seba xo nêciwîya. Eke ey xo wina dî ganî pêro embazî xo deyndar bihesibnê. Embaz Hayrîyî yew nîsbet naro seba têkoşînî. Embaz Kemal Pîrî vatbi 'Ma mergî gênê xo ver, seba ke cuye bivisnê destî ganê xo feda kenê. Ma cuye ra hende hes kenê ke seba ci mirenê.' Rayber Apoyî zî vatêne 'Eke yew cuye est ba, do bingeyê azadîye de biba.' Embaz Kemalî partîbîyayîşî rê yew nîsbet verda. Embaz Akîfî nîsbetê têgêrayîşî na ro. Seba ke çalakîya 14ê Temmuze ra fek vera bido dewlete meseleya keyeyî vejena vernîya ey la o ney red keno û vano 'Rojdemê mi de keyeyê mi nê welatê mi, partîya mi, rayberî, embaz û şarê ma est ê. Ez seba nînan têkoşîn kena.' Embaz Alî Çîçek ciwanêk bi. Ey têkoşîn kerd, birîndar bi, zîndan de qetî milê xo çewt nêkerd, tewrê pêro çalakîyan bi. Ey bi qerardarî çalakîya 14ê Temmuze de ca girewt. Dişmenî kerd ke verê ey bigêro la ey nêverda. 

Yanî nê embazanê ma, ma rê nîsbetî verdayî, ma kerdî pîlêr. Xizmetê înan seba partî û şarê ma zaf pîl bîyî. Ma deyndarê înan ê û wazenê deynê xo bidê. Nê esasî ser o ma têkoşîn kenê.

14ê Temmuze ruhê azadîye, demokrasî, serkewtişî yo, ruhê vervejîyayîşê îqtîdar, koletî îxanetî yo. No ruh bedelê ci se beno wa bibo, xo rê têkoşîn keno esas. Nê ruhî de çêrî, mesuldarî, çareserîye, îrade, perwerîya embazîye, hûrmetê embazîye û afernayîşî est ê. Nê ruhî de serewedaritişê vera koletîye, esaskerdişê azadîye, esaskerdişê azadîya cinîyan, heskerdişê welatî, têkoşîno qetî, xizmetê welatî est ê. Nê ruhî de tim seba partî, embazan, şar, merdimîye û Rayberîye xizmetkerdiş est o. No ruh rexneyanê xo dano, bêedaletî, neheqî û lêşinîye qebul nêkeno. No ruh ruhê Rayber Apoyî yo. Rayber Apoyî no ruh seba milîtananê PKK û PJAKî aferna. Coka çew nêeşkeno nê ruhî teslîm bigêro.

Embaze Dîdara ke nê rojan de Metîna de şehîd bîya, Almanya de bîya pîl, dima şîya Amerîka û dima zî vera xo da Kurdîstanî, bîya gerîla. Na embaza ma Almanya û Amerîka de pêro îmkanî red kerdî û seba şar û welatê xo têkoşîn kerd esas. Ganî pêro ciwan û cinîyî na embaze ma mîsal bigêrê. Kesayetê embaze Dîdare layîqê ruhê 14ê Temmuze yo. Eke ti wazenî biciwîya ganî verê xo bide tîya. No to dano ciwîyayene. Embaze Dîdare kerd ke her kes naye fam bikero. Coka ma deyndarê embaze Dîdare yê û ganî ma deynê xo bidê.

Senî ke embazanê ma Zîndanê Dîyarbekîrî de verê têkoşînî akerd nika zî Zap, Metîna û Avaşîn de embazê ma ruhê 14ê Temmuze berz kenê. Embazê ma ewro Zap, Metîna û Avaşînî de sey çalakîkeranê 14ê Temmuze ruhî danê merdimîye, hêzanê demokrasî û azadîye rê benê hêvî. Embazê ma nika sey çalakîkeranê 14ê Temmuze mîyanê şert û mercanê giranan de vera dişmenî şer kenê, vera hêrişanê kîmyewîyan xo ver danê û ganê xo feda kenê. Ê kenê ke her kes hêzê şarê kurdî û PKKyî bivîno.

Ewro eke no şero pîl yeno kerdene, no xêrê ruhê Hayrî,Kemal, Mazlûm û Akîfan ra yo. Embaze Zîlane zî asta nê ruhî berz kerdbî. Embazanê ma yê Zap, Metîna û Avaşînî zî no ruh berz kerd. Ganî her kes têkoşînê nê embazan xo rê bikerê mîsal. Ganî şarê kurdî, merdimîye, têgêrayîşê dinya erjanê nê embazanê ma xo rê bikerê esas. Xora ewro ruhê PKKyî, xeta Rayberîye xo pêro dinya de şinasîyenê û yenê caardene. Hînî Rayber Apo, milîtanê PKKyî, cinîyê PKKyî, ciwanê PKKyî û şarê PKKyî şinasîyenê.''